0

WOK BLONG WAN “LIQUIDATOR”

Long tufala last atikel yumi tokbaot “winding-up” o “liquidation” blong wan kampani. Naya bae yumi tokbaot wok blong wan “liquidator” we kampani o Kot i apoetem.

Loa blong Kampani “Companies (Insolvency & Receivership) Act” hemi tokbaot olsem wanem blong apoentem wan “liquidator”:

  1. Tru long wan agrimen blong ol darekta blong kampani;
  2. Tru long wan agrimen blong olgeta shehoda we oli gat raet blong vote;
  3. Tru long wan oda we Kot i givim folem wan aplikesen we Kampani, wan darekta, wan sheholda, wan kredita o Rejistra blong Kampani i faelem.

Wok blong “liquidator” hemi blong mekem sua se Kampani i pembak evri kredita.  Hemia i minim se sapos kampani i nomo gat mani be hemi mas traem blong faenem wan wei blong pembak ol kredita.

Ol wok blong “liquidator”oli olsem:

  1. Wok blong “liquidator” blong givimaot notis

Taem we Kot o kampani i apoentem wan “liquidator”, “ Liquidator” ia i mas letem pablik i save abaot apoenmen blong hem. Hemi mas talem deit mo taem we oli putum kampani long “ liquidation”  mo givimaot ol kontak ditel blong hem blong ol kredita mo sheholda oli save kontaktem hem long taem blong wok. Bifo 10 dei i pass afta we oli apoentem hem, hemi mas givim ol infomesen blong apoenmen blong hem long Rejistra blong kampani blong oli rejistarem.

  1. Wok blong “liquidator” blong kipim rikod blong faenens mo ol wok

 

Loa i no klia long ples ia be from “liquidator”  i mas shoem rikod blong ol wok we hemi mekem long ol kredita mo sheholda so hemi impoten blong hemi kipim rikod ia. Rikod ia bae i shoem ol wok we “liquidator” i mekem mo kipim ol rikod blong ol minit mo ol samting we Kot i odarem hem blong mekem. “liquidator” i mas mekem sua se hemi rikodem evri akaon, risit mo ol pemen we  hemi mekem blong shoem long ol kredita , sheholda mo ol odita taem oli askem .

 

  1. Wok blong “liquidator” blong holem sam miting

 

“Liquidator” i mas infomem ol kredita mo givim 5 dei notis long pablik bifo fas miting. Miting ia i hapen 10 o 30 dei afta we Kot o kampani i apoentem wan “liquidator”. Seksen 41 blong loa blong kampani i givim raet “Liquidator”blong hemi disaet  blong no holem wan miting sapos hemi necessary o nogat.

  1. Wok blong “liquidator” blong givimaot infomesen

 

“Liquidator” i mas priperem wan ripot wetem list blong evri kredita mo sendemaot i go long olgeta. Semak list ia hemi mas sendem i go tu long ol sheholda mo Rejistra blong kampani blong hemi rejistarem. Ripot ia i mas gat wan stetemen blong ol bisnis blong kampani, proposol blong olsem wanem prosess blong “liquidation” bae i hapen mo givim wam estimet taem blong wetaem bae “liquidation” prosess bae i komplit.  Taem blong givimaot ripot ia i dipen long taem we oli apoentem “liquidator” ia. Sapos we kampani i apoentem “liquidator” bae hemi mas givim ripot ia after long 45 dei. Sapos Kot i apoentem “liquidator” ia bae hemi gat 25 dei blong givimaot ripot ia. “Liquidator” i mas sendemaot wan ripot long evri kredita mo sheholda evri 6 manis kasem we“liquidation” i Komplit. Hemi mas sendem ripot ia 2 manis bifo end blong 6 manis ia. Ripot ia i mas shoem wok we “liquidator” i mekem mo eni niu proposol we hemi nid blong mekem blong komplitim “liquidation”. Hemi mas sendem copi blong ripot ia i go long Rejistra blong kampani tu.

  1. Wok blong “liquidator” blong inspektem wok blong ol workman blong kamapni

 

Taem we kampani i go long “ liquidation” ol darekta oli nomo gat krontrol ova long ol bisnis blong kampani. Evri darekta i mas givim long “ liquidator”ol ditel blong evri propeti we i stap wetem olgeta. “ Liquidator” i gat raet blong askem long ol darekta blong oli givimbak ol propeti blong kampani we i stap wetem olgeta. Wan we i no wantem givimbak propeti blong kampani i save go long prisen blong 2 yia o pem wan faen blong VT 125,000. “Liquidator” i save faelem wan aplikesen mo askem long Kot blong i tekembak wan propeti we oli givimaot we i no folem stret fasin olsem eni propeti we oli salem long wan praes we i no riflektem valu blong propeti ia o sapos kampani i kontinu blong mekem bisnis i wok luss afta “liquidation”. Long kes we bisnis i gohed blong operet afta we oli talem se hemi go long “ liquidation” mo i wok luss bae ol darekta nao oli save risponsibol blong pembak ol luss ia.

  1. Wok blong “liquidator” blong tekem mo sherem ol propeti blong kampani

Fas wok blong wan “ Liquidator” hemi blong tekem evri propeti blong kampani mo mekem mekem sua se hemi mekem gud wok blong hem.  Evri propeti we hemi tekembak hemi no blong ol darekta be blong ol kredita. Afta we oli apoentem hem, “ liquidator” i mekem sua se hemi mas gat evri buk, pepa, mani mo ol narafala propeti blong kampani we oli stap wetem eniman mo mekem sua se hemi gat evri propeti blong kampani bifo hemi save sherem. Hemia i minim se hemi mas gat evri kaon blong kampani, hemi mas save sapos i gat eni kes agensem kampani. Taem we hemi salem ol propeti nao hemi akt long nem blong kampani blong saenen eni pepa blong kampani. Hemi mas pem ol kredita stat long hemia we kampani i gat bigfala kaon long hem kasem smol wan evriwan.

Wok we “liquidator” i mekem i no fri mo oltaem ol wok we hemi mekem nao oli pem fastaem afta we hemi salem ol propeti blong kampani.  “Liquidator” i save givimaot wan amaont blong pemen bifo hemi statem wok o oli save pem hem folem haoa blong wok blong hem o hemi save askem wan pesem long amaont blong ol propeti afta we oli salem ol. Valu blong wok blong “liquidator”  i folem nomo:

  • Sapos kes ia i kompliketed ;
  • Hemi wok gud mo i wok kwiktaem;
  • Sapos hemi mekem wok pitim wanem we hemi mas mekem;
  • Valu mo neja blong kes.

 

 

DISCLAIMER – This is a legal column to provide basic information on the law and court procedure. It is not to be used as a substitute for legal advice but to be used only as a starting point in understanding what you might need and what you might need to do. 

 

Leave a Reply

Your email address will not be published. Required fields are marked *