WOK BLONG SHERIF LONG INFOSMEN BLONG WAN JAJMEN
Sherif blong Suprim Kot hemi wan ofisa blong Kot we hemi risponsibol blong karemaot o infosem ol oda blong Kot. Sherif hemi wan infosmen ofisa mo wok blong hem i blong mekem sua se ol man oli rispektem ol oda mo direksen blong Kot.
Hemia hemia list blong ol wok blong sherif:
- Sevis blong ol Samon
- Sevis blong ol Waren
- Sevis blong ol Infosmen Oda
- Sevis blong ol Oda blong Kot
- Executim ol Waren blong holemtaet mo salem wan propeti
- Executim ol Waren blong putumaot ol man long wan graon
- Executim ol Waren blong tekembak wan graon
- Executim ol Waren blong arestem man tugeta wetem polis
- Sevis blong eni narafala Oda blong Kot
Long atikel ia bae yumi luk moa long Rule 14.16-14.21 blong Civil Procedure we i dil wetem infosmen blong wan Waren blong holemtaet mo salem wan propeti
Afta we jajmen kridita i priperem ol copi blong infosmen warren mo sendem i go long Kot bae oli saenem bae Masta o wan Jaj i luk tru long hem blong mekem sua se i stap long stret fom mo infomesen long hemi i stret mo bae hemi saenem mo givim long Ofis blong Sherif. Taem Sherif i risivim warren ia bae i wokemaot hamas time nao hemi nidim blong holemtaet mo salem propeti ia. Sherif i stap executim ol Waren folem which wan nao oli risivim fastaem. Be sapos i gat wan Waren we i nid blong infosem qwicktaem, bae sherif i putum long fas list blong hem.
Sapos Sherif i gat wan infosmen Waren blong holemtaet mo salem graon hemi mas go long ofis blong graon fastem mo faenem stret se graon ia i stap long nem blong jajmen debta. Sapos Sherif i gat wan infosmen Waren blong holemtaet mo salem wan trak, hemi mas go long ofis blong transpot mo faenem stret se trak ia i stap long nem blong jajmen debta
Sherif i save holemtaet wan propeti nomo we i stap long nem blong jajmen debta o jajmen debta i wan benefisiari long propeti ia.
Wan man i save gat wan ligel onaship o wan benefisel onaship long wan propeti. Ligel onashipi minim se wan propeti i regista long nem blong jajmen debta mo benefisel onashipi minim se propeti i no stap long nem blong jajmen debta be i gat pruf se hemi gat wan intres long propeti ia.
Ol propeti we sheriff i no save holemtaet hemi ol propeti we Bankrapsi Loa blong Vanuatu i excludim olgeta , we hemi ol ting olsem ol clos, ol ting we i alaowem jajmen debta blong i mekem bisnis. Sapas jajmen debta hemi wan capenta bae sherif i no save holemtaet tulbox blong hem. Sapos infosmen warren i no kliali indikatem ol ting we sherif bae i holemtaet bae sherif i mas mekem sua se hemi chekem Bankrapsi Akt blong hemi save stret wanem hemi no save holemtaet.
Taem Sherif go blong givim warren hemi mekem sua se hemi givim stret long jajmen debta mo letem hem i save se hemi gat 7 dei blong kamaot long propeti bifo sherif i statem blong tekem aksen.
Wei blong holemtaet wan propeti hemi dipen long ol rul long wan kantri, be long Vanuatu, sherif bae i putum notis long properti blong letem ol man oli save se propeti ia sheriff i holemtaet. Ol notis we sherif i stap putum oli mas stap long klia ples we man i save luk olsem long foret blong doa blong haos, long stampa blong wan bigfala tri long foret blong haos o long fanis blong propeti.
Taem we sherif i holemtaet wan track, hemi tekemaot trak ia mo putum long wan sef ples, olsem long yad blong Kot, mo bae trak i stap kasem we sherif i salem.
Afta we sherif i holemtaet wan propeti, bae hemi putum wan deit blong salem. Sherif bae i go mekem wan anaonsmen long radio mo niuspepa tu o fo wik bifo deit ia. Afta bae hemi putum copi blong anaonsmen ia long ofis blong Kot closap long ples we propeti ia stap long hem.
Sapos propeti blong salem ia wan kakai mo from we hemi save nogud qwicktaem, ol anaonsem blong salem ol samting olsem sherif i save mekem hariap nomo blong mekem sua se hemi salem bifo i nogud .
Naya, evri propeti we sherif i salem hemi tru long pablik tenda. Hemia i minim se sherif bae i putum wan deit we pablik i save mekem ol ofa long ol amaont blong mani we oli rere blong pem propeti ia long hem. Afta long deit ia bae wan panel blong ol ofisa blong Suprim Kot oli sidaon mo jusum wina blong pablik tenda ia. Panel i jusum wina folem amaont blong ofa we oli luk se hemi stret long wan propeti. Afta bae oli letem man ia i save se hem nao i winim tenda ia mo bae givim hem wan deit blong mekem pemen. Taem we wina ia i mekem pemen i go long ofis blong akaon long Suprim Kot, sherif bae i mekem sua se propeti i regista long nem blong wina ia. Sapos fas wina ia i no save pem propeti ia long taem we panel i putum, bae panel i letem wan we i kam nambatu wetem bigfala ofa sapos hemi wantem pem propeti ia.
I no se wan man i mekem wan bigfala ofa nao sherif i mas akseptem ofa ia. Oltaem sherif i luk long Rule 14.18 (3) blong CPR 2002 we i talem se hemi mas salem propeti ia long wan gudfala praes we hemi save obtenem. Nao sapos sherif i luk se ol ofa we hemi risivim hemi no ol gudfala praes be hemi save sakemaot ol ofa ia mo mekem niu anaonsmen bakeken blong salem propeti ia long radio mo niuspepa.
Taem we panel i akseptem wan ofa, wina bae i mas mekem pemen i go long Kot mo amaont we Kot i risivim, bae hemi tekemaot 10% we hemi kavremap ol expensis blong infosmen. Haf mani we i stap bae sherif i givim long jajmen kredita blong pemaot kaon blong jajmen debta. Sapos i gat sam mani i stap yet, bae sherif i givim long jajmen debta.
WANEM BLONG MEKEM SAPOS YU WAN JAJMEN DEBTA MO YU RISIVIM WAN WARREN BLONG HOLEMTAET PROPETI BLONG YU
Sapos yu gat wan loia, yu tekem warren ia i go long hem mo askem advaes long hem. Sapos nogat we yu mas folem instruksen we sherif i givim long yu from sherif hemi akt folem power we Kot i givim long hem.
Taem yu risim wan warren yu gat 7 dei blong tekem ol famili mo ol ting blong yu mo muvaot long propeti. Yu save tekem wetem yu ol samting we i no stap long warren. Be sapos yu tekem wan samting we stap long warren ia sherif i gat raet blong tekemaot long yu. Sapos yu nidim moa taem blong muvaot long propeti, yu mas mekem wan aplikesen i go long Kot mo askem wan extensen. Aplikesen ia i no minim se bae Kot i givim long yu from Kot i save wetaem yu risivim jajmen mo wetaem yu risivim warren.
Be sapos yu bin faelem wan Apil agensem jajmen we Kot i entarem agensem yu mo save shoem long Kot se yu gat ol gufala risen blong winin kes blong yu long Apil mo sapos Kot i infosmen jajmen ia bae hemi kosem trabol long yu be yu save mekem wan aplikesen folem CPR 14.20 mo askem long Kot blong i posponem deit blong salem propeti. Yu save mekem wan apliksen long Kot tu sapos yu luk se wan samting i no stret long warren o warren we yu risivim i no folem wanem we rul i talem.
Sapos Kot i sakemaot apliksen blong yu blong posponem deit blong salem propeti be sherif bae i gohet blong infosem warren ia. Sapos Kot i grantem apliksen blong yu bae sherifi tu i stopem infosmen kasem taem we Kot i mekem wan niu oda we i givim him pawa blong infosem warren ia.
Olsem jajmen debta, yu gat raet blong askem infomesem long sherif abaot ol ofa we hemi risivim blong mekem sua se oli salem propeti ia long wan praes we i mitim value blong propeti blong yu.
Hemi wan woning we i bin kamaot long ol narafala atikel finis: TAEM YU RISIVIM WAN ODA BLONG KOT YU NO TING NATING LONG HEM. YU GO LUK LOIA BLONG YU QWICKTAEM BLONG ASKEM ADVAES. BE SAPOS YU NOGAT LOIA MEKEM SUA YU GO LONG OFIS BLONG KOT MO FAENEMAOT WANEM NAO YU NID BLONG MEKEM.
DISCLEMA: Hemia wan ligel spes wea yu save faenem ol besic infomesen abaot loa mo olsem
wanem Kot i wok. ol infomesen ia oli no ligel advaes be oli stap blong helpem eniwan i
andestanem wanem blo mekem.
sapos yu kat eni kwestin o nidim eni clarifikesen abaot ol infomesen ia yu save raet i kam long
(vanuatulaw@gmail.com) o visitim websaet blong mifala long (www.pawthelaw.info)