Articles

Mediasen hemi wan fasin blong solvem problem aotsaet long Kot. Jaj i save askem long ol man we oli kat wan kes long Kot blong oli solvem problem blong olgeta tru long mediasen. Be from se mediasen hemi wan volentari prosess, ol man we oli kat wan kes long Kot oli save agri long hem o disaet se no oli wantem continu nomo wetem Kot blong olgeta long Kot. Bifo wan kes i go long mediasen, ol man long tugeta saet blong Kes i mas agri long hem.

Olsem wanem mediasen i difren long wan kes bifo long Kot

• Long Kot Jaj nao i disaet long kes be long mediasen ol man long tugeta saet blong kes nao i disaet long wanem we tufala i wantem.
• Insae long Kot bae ol loia long tufla saet blong kes bae oli traem blong  shoem long Jaj se hu nao i raet. Be long mediasen tufala man nomo i talem stori long tufala traem blong faenem wan agrimen.
• Taem wan kes i go long Kot bae i kat wan man we i glad from hemi winim kes blong hem mo narafala bae i harem nogud from hemi luss. Be long mediasen bae tufala i tokbaot ol tingting blong tufala mo agri long hem. Nao tufla tugeta i kamaot wetem wan samting we tufla i glad long hem.
• Kot i no wantem save long relasenship blong ol man long kes be mediasem hemi traem blong kipim gufla relasenship ia i stap.
• Taem yu go long Kot i kat ol strik rul blong folem mo sapos yu mestem bae Kot i save tekem ol strong aksen agensem yu. Be taem ol man oli kam long mediasen, i no gat ol strik rul ia be man i mas kam wetem wan gudfala tingting mo i mas rere blong toktok mo talem ol tingting blong hem.

From wanem nao mediasen hemi gud

• Mediasen hemi kwik blong solvem wan kes mo hemi no sas
• Evri samting we yu talem long mediasen hemi sicret
• Ol man we oli go tru long mediasen oli rispektem moa ol agrimen we oli mekem from olgeta nao oli mekem ol agrimen ia
• Mediasen i helpem ol man blong oli kipim gufala rilasenship blong olgeta
• Man we i go tru long mediasen bae hemi glad moa from hemi save mekem wan agrimen wetem narafla man
• Long Mediasen tufla man nao tufala i toktok be ino loia o Jaj
• Mediasen i helpem ol man blong andestanem from wanem nao narafla man i mekem wanem we hemi mekem.
• Taem yu go long Kot yu save se bae yu win no yu luss. Be long mediasen bae yu faenemaot se yu kat fulap wei blong solvem problem blong yu tru long discusen blong yu wetem narafala man.

Olsem wanem nao bae mediata i save helpem yu long kes blong yu

• Maet yu wantem toktok blong solvem kes blong yu be yu faenem i no isi blong toktok wetem man long narafala saet be mediata i save buildimap komunikasen ia
• taem yu fraet no yu no save olsem wanem nao blong toktok wetem man long narafala saet mediata hemi kam olsem wan midel man blong helpem yu mo loia blong yu blong faenem wan agrimen wetem man long narafala saet
• Maet yu traem blong solvem problem blong yu be yu fasfas
• Maet loia blong yu nomo i stap toktok blong faenem wan solusen be yu tu yu wantem tekem pat long ol discasen ia
• Maet yu ting se kes blong yu i compliket lelebet mo yu ting se yu nidim wan midel man blong helpem yu blong save faenem wan solusen

Mediasen i wok olsem wanem

Bifo dei blong mediasen bae tufala man wetem ol loia blong tufala i mitim mediata blong tokbaot wanem pepa o infomesen nao oli nidim blong tekem i kam long mediasen. Bae mediata i askem evriwan blong gobak mo tingting long wanem nao oli wantem narafala saet blong i save, wanem oli rere blong akseptem mo wanem nao oli save ofarem long man long narafal saet.

Long dei blong mediasen evri man i kam tugeta mo bae mediata i stat blong explenem wanem nao mediasen mo wanem wanwan man i nid blong mekem. Evri toktok we yu talem long mediasen hemi sicret mo sapos mediasen i no saksesful mo kes ia i go bak long Kot man bae ol i nogat man i save yusum ol infomesen blong mediaesen olsem pruf long Kot.

Yu save atendem mediasen yu wan be sapos yu wantem kam wetem loia blong yu hemi stret nomo. Long mediasen bae ol man oli sidaon kolosap long mediata mo loia blong olgeta oli sidaon bihaen. From long mediasen bae ol man oli tokbaot stori blong olgeta mo talem tingting blong olgeta long mediata. Loia hemi stap nomo blong helpem wan man sapos i kat wan samting we oli nidim advaes from. Be loia i no stap blong toktok long bihaf blong yu. Sapos mediata i luk se wan loia blong i toktok tumas be i no help blong mediasen i gohed bae hemi save askem long loia blong i aot long mediasen.

Bae mediata i save askem blong i toktok wetem yu long praevet o yu save askem blong toktok wetem hem long praevet sapos yu no wantem se man long narafala saet i harem sam samting we yu wantem talem long mediata. Mediata i save talemaot ol storian blong yutufala long man long narafala saet nomo sapos yu agri blong hem i talem.  Nao taem ol man long tufala saet i agri long wan tingting bae mediata i helpem evriwan blong raetem daon agrimen ia mo evriwan i mas saenem. Wan mediasen agrimen hemi olsem wan oda blong Kot mo evriwan i mas rispektem.

Long mediasen desisen hemi blong yu wan . Mediata mo loia oli no stap blong fosem yu blong agri long wan samting. Be oli stap nomo blong helpem yu blong luk evri saet blong stori mo yu nao bae yu luk se yu laekem wan mo agri long hem.

Hemia ol kaen disput we yu save solvem tru long mediasen

• Contrak
• Taem yu Kosem wan aksident long narafala man
• Damej long propeti
• Disput long baondri
• Disput wetem neiba blong yu
• Agrimen blong sherem ol pikinini
• Sherem properti long taem blong divos
• Pembak kaon

Kost blong mediasen

Sapos yumi comparem kost blong mediasen wetem kost blong go long Kot mo taem yu spendem long wan kes, mediasen hemi no sas nating.

Sapos yu tekem wan kes i go long kot bae yu save pem araon VT 300,000 kasem VT 4 million mo hemia bae i dipen long  wanem kaen kes nao yu tekem i go long Kot. Antap long ol kost ia bae yu mas pem fi blong go long Kot we hemi VT 30,000 long wan dei. Be mediasen fi hemi VT 15, 000 long wan dei mo we wan man i pem nomo VT7, 500.

Taem blong mediasen

Long fulap kes, mediasen i tekem wan dei nomo. Be samtaem mediasen i save go longfala moa long wan dei from hemi dipen long kaen disput we i stap mo ol man we oli kam long mediasen.

Hu nao i stap tekem ol kes long mediasen

Naya i kat Masta mo Deputi Masta blong Suprim Kot nomo we tufala i save tekem ol kes blong mediasen.

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan i andestanem wanem blo mekem.

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info)