WANEM IA WAN “VEXATIOUS LITIGANT”
Long Vanuatu i gat ol man we oli save faelem semak kes fulap taem long Kot from oli no hapi wetem jajmen we oli risivim o oli mekem olsem nomo blong pulpulum kes i go longfala mo mekem naraman i harem nogud. Ol man olsem yumi kolem olgeta ol “Vexatious Litigant”
Wanem ia wan “vexatious litigant”?
Wan “vexatious litigant” hemi wan man we oltaem hemi faelem kes i go long Kot be hemi nogat inaf pruf.
Wanem ia wan “vexatious litigation”?
Yumi save talem se wan “vexatious litigant” i stap faelem ol “vexatious litigation”. Hemi i min se kes we man ia i faelem hemi nogat pruf mo wan man i faelem blong spolem narafala man nomo. “Vexatious litigant” ia bae hemi stap mekem ol trick blong hem blong faelem fulap kes o aplikesen bae taem yu ridim yu faenemaot se kes blong hem i no stret long loa.
Wanem ia wan “vexatious proceeding”?
Wan “vexatious proceeding” hemi:
- Wan kes we wan man i faelem long Kot blong abiusum process.
- Wan Kes we wan man i faelem blong wastem taem blong narafala man mo mekem narafala man i harem nogud.
- Wan Kes we hemi nogat pruf blong hem.
Hu nao i save aplae from wan Oda?
Sapos Kot i luksave se wan man hemi wan “vexatious litigant” o hemi faelem wan “vexatious proceeding” hemi save mekem wan oda no mata i nogat man i aplae. Be i gat ol narafala man tu we oli save aplae from wan oda olsem:
- Atoni-Generol o Solisita Generol;
- Man we i luk se Kes we oli faelem agensem hemi no gud;
- Eni narafala man we i gat wan interes long kes ia be hemi mas askem permisen blong Kot bifo hemi faelem wan aplikesen.
Olsem wanem blong shoem se wan man hemi wan “vexatious litigant”?
Yu fri blong faelem wan aplikesen i go long Kot sapos yu ting se man we i stap faelem ol kes o aplikesen agesem yu hemi blong spolem yu o mekem yu fraet nomo. Yu save luk long “Civil Procedure Rule 18.12 we i tokbaot ol kaen aplikesen ia mo we i talem se: “ Sapos kot i satisfae se wan man i strong blong faelem ol “vexatious proceeding” mo hemi nogat wan gudfala kes o pruf bae hemi save declarem man ia wan “ vexatious litigant.”
Yu mas faelem wan aplikesen i go long Kot blong askem Kot blong deklerem wan man se hemi wan “vexatious litigant”. Applikesen blong yu bae i mas kat wan swon statemen mo eni narafala infomesen we i shoem se man ia i stap faelem ol kes o aplikesen blong spolem yu nomo o mekem yu harem nogud o sapos yu luk se kes ia i no strong mo i klia nomo se bae man ia i no save winim kes blong hem. Yu mekem sua se yu sevem wan copi blong aplikesen blong yu long man we yu stap faelem apliksen ia agensem.
Olsem wanem blong dil wetem wan “vexatious litigant”?
Sapos we Kot i deklarem wan man olsem wan “vexatious litigant” bae man ia i nomo save faelem eni Kes long taem we Kot i putum. Be taem ia bae i no mas ova 2 yia. Sapos we man ia i wantem faelem wan narafala Kes o wan aplikesen be hemi mas askem pemisen blong Kot fastaem. Be sapos man ia i no askem pemisen blong Kot mo i gohed blong faelem wan kes yu save mekem wan apliksen blong Contempt i go long Kot ( Yu save ridim atikel blong contempt ia long niuspepa blong las wiken o go checkem long websaet blong mifala)
Bae yu mekem olsem wanem sapos yu wan “vexatious litigant” be yu gat wan kes we yu wantem blong Kot i harem?
Sapos se yu tingse yu kat wan impoten kes blong Kot i harem be Kot i deklarem yu “vexatious litigant” i gat wan wei blong Kot i save harem Kes blong yu. Yu mas faelem wan aplikesen i go long Kot mo askem pemisen blong Kot blong save faelem kes blong yu.
Insaet long aplikesen blong yu yu mas:
- Explenem long Kot from wanem yu wantem faelem kes o aplikesen ia,
- Tokbaot wanem nao i stap insaet long kes o aplikesen blong yu,
- Talem long Kot prejudis we bae yu fesem sapos Kot i refiusum blong yu faelem wan aplikesen
- Talem long Kot hamas taem yu bin aplae from pemisen ia
- Infomem Kot long ol prosiding we yu bin statem bifo Kot i deklarem yu “vexatious”
Taem we Kot i givim pemisen long yu nao yu save sevem aplikesen blong yu long narafala man. Sapos Kot i luk se i gat sam narafala man we hemi nid blong harem bae Kot i askem yu blong letem olgeta man ia i save mo bae Kot i givim olgeta wan opotuniti blong oli respon mo bae hemi harem olgeta long taem we hemi putum daon blong harem kes blong yu. Aplikesen blong yu bae Kot i save grantem o i sakemaot folem ol risen we yu putum.
Wanem bae i hapen sapos Kot i no grantem pemisen mo man i gohed blong faelem wan niufala Kes?
Long ples ia bae kot i save sakemaot ful kes o Kot i save mekem wan oda blong suspendem kes ia blong sam taem. Bae Kes ia i stap olsem blong wan manis afta bae Kot i save sakemaot.
DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan I andestanem wanem blo mekem.
YU SAVE RIDIM OL ATIKEL IA LONG BISLAMA LONG WESBAET BLONG MIFALA LONG WWW.PAWTHELAW.INFO.
sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info