TRANSFOMEM JASTIS SISTEM BLONG VANUATU – Pat 2
Long sam wik i pass Jif Jastis i talemaot long wan konfrens we hemi gat wetem ol loia se long yia ia bae Judisiari i go long olgeta narafala aelan we i hat blong ol man i kasem jastis long hem mo bae i tijim olgeta man we oli nogat loia long ol wei blong tekem wan kes i go long Kot. Long tusdei long wik ia Jif Jastis i gat wan miting wetem ol memba blong pablik blong harem tingting blong olgeta.
Long miting ia Kot i givim taem long pablik blong talem ol experiens blong olgeta taem oli go long Kot ( Majistret Kot, Suprim Kot, Aelan Kot) mo tru long ol experiens ia bae Kot i save kamap wetem sam tingting blong luk olsem wanem blong stretem sistem we i stap. Long dei ia, ol memba blong pablik oli talem se Kot i wok slo tumas, ol fi blong hemi oli sas mo hemi tekem tumas taem blong givimaot ol jajmen o blong ansarem kwestin taem ol memba blong pablik oli raet o kolem olgeta.
Oli infomem mifala se long ol trifala narafala dei i gat trening long saet blong faenem ol solusen blong stretem ol problem ia insaet long Kot.
Dokta Livingston we hem nao i prisentem ol trening ia i talem long ol memba blong pablik se bifo miting ia , hemi bin visitim Epi, Pentekos, Santo mo Malekula mo hemi bin gat 45 miting evriwan mo hemi storian wetem ova long 600 man. Namba ia i includim ol jif, man mo woman. Hemi faenemaot se ol man long aelan oli komplen moa long saet blong raorao blong graon mo talem se ol woman mo ol pikinini oli no gat akses long jastis from i nogat polis mo i nogat Kot.
Be taem yu lukluk gud, fulap long ol man aelan oli no save olsem wan Kot i wok mo olsem wanem olgeta oli save yusum ol sevis blong Kot blong i helpem olgeta. Minista Regenvanu hemi stap tu long miting ia mo talem se ol kes blong graon oli tekem longtaem tumas mo i gat sam loia we oli stap kiaman.
Nao, sapos we yu wan long olgeta long list ia be Kot i save helpem yu mo protektem yu:
- Sapos yu nogat loia
- Sapos yu wan Pikinini o yu no gat 18 yia yet
- Sapos yu wan woman we oli bin sexually abiusim yu
- Sapos yu no haremsave lanwis we oli yusum long Kot
- Sapos yu stap long wan long ol aelan farawe
Wanem nao bae yumi save luk long ol yia we i kam we Kot bae i save mekem blong helpem olgeta we oli stap long list antap ia?
- I kat wan Disiplinary Komiti we i stap blong lukluk long ol kes we ol man oli faelem agensem ol loia we oli no mekem gud wok blong olgeta. Jif Jastis i talem se i gat sam desisen we oli pablishim long paclii we ol memba blong pablik oli save go luk.
- Sapos hemi posibol blong raetem ol jajmen long bislama blong evriwan long kantri i save ridim mo andestanem desisen blong Kot
- Bae i gat moa infomesen long websaet blong Kot blong helpem olgeta we oli no gat loia.
- Bae Kot i givimaot moa infomesen blong tijim pablik long ol stamba raet blong wan man we i stap long konstitusen olsem raet blong laef, raet blong yu blong loa i protektem yu mo raet blong wanwan wan blong gat semak tritmen taem oli go long Kot mo samfala moa.
- Kot i stap plan blong go long ol narafala aelan mo tijim ol jif, ol woman mo man olsem wanem Kot i wok mo olsem wanem wanwan man i save yusum ol sevis blong Kot.
- Olgeta we oli wok long Rejistri blong Kot oli stap wok blong givimaot wan gudfala sevis long evriwan mo bae oli traem long ansarem ol kwestin blong pablik kwiktaem, mo
- Taem we Minista i kam blong tokbaot ol konsen blong hem long Kot, hemi promessem Kot se bae i gat wan niufala Kot haos.
Mifala i stap traem blong helpem ol manples blong luksave olsem wanem nao ol Kot oli wok mo helpem evriwan blong save olsem wanem blong yusum ol sevis blong Kot. Yumi mas glad from fulap samting i jenis long taem we i kam. Hemia i minim se Kot bae i traem blong helpem ol man oli luksave wok blong hem mo mifala long Vanuatu Law bae mifala i kontinu blong explenem jastis sistem long wan lanwis we yumi evriwan i haremsave. Mo long semak fasin, bae Kot i go aot long ol aelan blong Vanuatu blong tijim ol man blong luksave mo yusum sevis blong Kot. Bae yumi evriwan i traem blong joen tugeta mo mekem se jastis sistem ia i wok blong benefitim evriwan.
Visen blong Kot long yia ia 2019
Leftemap trast mo konfidens blong pablik.
Misen blong Kot long yia ia 2019
Impruvum sevis we Kot i stap givimaot long evriwan we i yusum sevis ia mo helpem evriwan blong kasem jastis.
DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan i andestanem wanem blo mekem.
sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long