0

STATEM WAN KLEM

Sapos yu wantem tekem wan kes i go long Suprim Kot bae yu mas go long ofis blong Suprim Kot mo faelem wan klem.

 

Wan klem hemi wan pepa we yu raetem daon stori blong kes blong you long hem mo talem nem blong man we kes blong yu i go agensem mo yu askem long Kot blong i mekem wan oda blong man ia i pem yu from ol nogud fasin we hemi mekem long yu.

 

Bifo yu tekem kes blong yu i go long Kot yu mekem sua se askem ligel advaes [ hemia yu save luk long atikel blong yumi “OL SAMTING BLONG SAVE TAEM YU TEKEM WAN LOIA mo TAEM YU RIPRISENTEM YU WAN LONG WAN CIVIL KESmo yu maet wantem blong luk tu sapos yu save solvem issue ia aotsaet long Kot olsem tru long mediasen.

 

Afta we yu go tru long evri prosess ia be yu ting se yu stil wantem go long Kot, yu mas save wanem Kot nao i stret blong harem kes blong yu, wanem stret fom blong yusum mo wanem fi blong Kot we yu nid blong pem.

 

Long Vanuatu evri kes we amaont blong klem i no bitim VT 2 million yu faelem long Majistret Kot.  [infomesen ia yu save faenem long ples ia: http://www.paclii.org/vu/legis/consol_act/mcja403/].

Be ol kes we amaont blong  klem hemi VT 2 million ova yu nid blong faelem long Suprim Kot.

 

Taem yu statem blong faelem wan klem bae yu pem wan fi blong VT 20,000. Yu save faenem ol difren fi blong kot long schedule we i stap insaet long Civil Procedure Rules (CPR) 2002. Yu save faenem wan copi blong rul ia long [http://www.paclii.org/vu/rules/ct_rules/cpr2002s303/]. Fi ia afta we yu pem yu nomo save askem blong tekem back.

 

Yu mekem sua se Klem blong yu i tokbaot evri impoten poen we yu wantem blong Kot i lukluk long hem. Mo yu mekem sua se yu raetem loa we yu stap stanap long hem long kes blong yu mo yu talem i klia wanem oda nao yu stap askem long Kot. Yu no nid blong putum any pruf insaet  long klem from hemia bae i jes kam afta.

 

Taem yu stap raetem klem blong yu, yu mas stap putum tugeta ol pruf we yu gat. Yu tekem ol witniss we oli save sapotem stori blong yu mo ol witniss blong yu oli mas save talem stret toktok. Sapos i gat any pepa olsem leta, resit o moa we oli save sapotem klem blong yu, yu putum gud olgeta tu blong yu save yusum olsem pruf. Storian blong yu bae hemi strong moa sapos yu kat witniss mo ol pepa we oli saportem klem blong yu

 

 

 

Klem ia i mas: [SEE:http://www.paclii.org/vu/rules/ct_rules/cpr2002s303/]

  • Gat heding we i semak longFom 1 long CPR.
  • Stap long Fom 5 blong CPR we i kat tu ol notes i go long difenden.
  • Gat wan Response fom we i stap long Fom 7 we hemi blong difenden.
  • Klia we oli save ridim o yu mas taepem long wan computa.
  • Gat ol difren paragraph we wanwan paragraph i deal wetem wan separate impoten poen.
  • ol paragraph ia bae oli mas gat namba blong hem.
  • Shoem adress blong loia blong yu, yu putum address blong yu nomo sapos yu nogat loia, telefon namba mo email adress we Kot mo defenden i save kasem yu long hem sapos oli nid blong givim wan pepa long yu.

 

Wan klem hemi laef blong 3 manis nomo. Afta we yu faelem klem blong yu, yu mekem sua se yu pesonaly sevem defenden wetem klem ia long taem ia nao. Pesonal sevis i min se yu givim klem ia long stret man we yu wantem passem hem long Kot. Sapos hemi no wantem tekem klem ia nao yu save putum daon long foret blong hem. Sapos yu mestem blong sevem defenden wetem klem long 3 manis taem ia, klem ia i ted. Yu mas kam long Kot mo aplae blong reniuwim klem ia bakeken bifo yu save go givim long defenden. Sapos yu faenem i hat lelebet blong sevem defenden, yu save mekem wan aplikesen long Kot blong sevem defenden tru long wan difren we mo bae kot i save directem yu long hem. Afta we yu sevem klem ia, defenden i kat 14 dei blong ansa long klem blong yu. Be sapos hemi no faelem wan ansa nao hemi gat 14 dei blong faelem wan difens [ Luk long CPR 4.13(2)] afta we oli ricivim klem ia.

 

Bae yumi jes luk long wan narafala atikel wanem blong mekem taem wan man i sevem wan klem long yu.

 

 

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan i andestanem wanem blo mekem.

 

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info

 

 

Leave a Reply

Your email address will not be published. Required fields are marked *