SAVE RAET BLONG YU – (Pat 4)
Las wik yumi tokbaot 2 long olgeta 11 Raet blong wan man olsem we i stap long Konstitusen blong Vanuatu. Long wiki ia bae yumi tokbaot 2 long ol Raet ia blong save moa long olgeta.
Raet blong fridom blong kam tugeta mo mit
Raet ia i givim fridom long evri man blong kantri ia blong kam tugeta mo mit mo gavman i no save stopem olgeta. Tinting behaen long raet ia hemi blong wanwan man i praktisim Raet blong fridom blong kam tugeta mo mit folem fasin blong pis.
Hemia i minim se wanwan man i fri blong joenem eni grup blong politic. Wan man i fri blong joenem ol grup blong ol wokman we oli stap blong protektem interes blong hem olsem wan wokman mo gavman o boss blong hem i no save stopem hem. Eniwan we i stopem raet ia i minim se hemi brekem raet blong wan man olsem we i stap long konstitusen mo aksen ia i no folem loa. Eniwan i fri blong joenem eni grup.I nogat man i save fosem naraman blong joenem wan grup blong ol wokman, wan grup blong politik o narafala asosiesen mo i nogat wan i save fosem eniman blong protes.
Eniwan i save stopem raet ia?
Olsem evri samting, i gat restriksen sapos wan man i yusum raet ia blong spolem narafala man o kantri. Ol taem we gavman i save stopem raet ia hemi:
- Blong Protektem sekuriti blong kantri o safeti blong pablik
- Blong stopem kraem o samting we i save distepem pis long Pablik
- Blong Protektem helt mo moral
- Blong Protektem raet mo fridom blong narafala man
Aksen we gavman i tekem hemi mas nesesari long taem we hemi stap dil wetem wanem we i hapen.
Raet blong fridom blong muv olbaot
Raet ia hemi givim fridom long wan man blong muv olbaot long Vanuatu. Wan man i fri blong stap long eni ples long Vanuatu mo hemi fri blong jusum wanem ples hemi wantem stap long hem. Sapos we hemi man ples hemi save go aotsaet long kantri mo kambak bakeken enitaem we hemi wantem.
Oli save stopem raet ia nomo:
- From Sekuriti blong kantri
- Blong Kipim pis
- From helt mo moral blong pablik
- Blong protektem raet mo fridom blong narafala man
Olgeta man we ol otoriti oli save stopem fridom blong olgeta blong muv olbaot hemi:
- Man we Kot i putum hem long kalabus from wan kraem we hemi komitim
- Man we i kamaot long kalabus be i stap long parol
- Man we i no blong kantri ia mo we i gat sam kondisen long visa blong hem we i stopem hem blong no muv olbaot, exampol blong wan kondisen ia maet hemi stopem wan man blong no kamaot long kantri 90 dei afta we hemi risivim visa blong hem.
- Man we i no blong kantri ia mo we oli dipotem hem from hemi brekem kondisen blong visa blong hem mo oli stopem hem blong muv olbaot long kantri
Exampol blong ol taem we oli save stopem fridom blong wan man blong i muv olbaot hemi:
- Oli stopem wan man blong i no go long ol ples blong invaramen.
- Oli stopem ol man blong no go long ol ples blong etkwek o ples we oli putum long kwarantine. Wan exampol hemi taem we gavman i stopem ol man Ambae blong gobak long ples blong olgeta blong sam taem from ol aktiviti blong volcano we i mekem ples ia i no sef blong man i stap long hem.
- Stopem wan man blong go long ol praevet propeti.
- Oli stopem ol man blong no mekem protes long samfala ples from hemi no sef o from sam narafala risen.
- Taem we i gat raiot long wan ples mo ol otoriti oli putum ol taem we evri man i nomo save wokabot olbaot.
Bae yumi tokbaot sam moa long ol raet ia long nekis atikel.
DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan i andestanem wanem blo mekem.
sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long