RISIVIM PROPETI BLONG MAN WE I DED (PT 4)
RIMUVUM WAN EXECUTA/ADMINISTRETA
Yu maet tingse hemi simple nomo blong Kot ia apoentem wan executa/ administreta. Be taem Kot i apoentem wan executa/ administreta hemi strong blong yu save rimuvum. So eniwan we i stap tingting blong rimuvum wan executa/ administreta hemi mas rere gud long ol pruf blong hem blong tekem i go long Kot mo shoem from wanem hemi wantem rimuvum wan executa/ administreta. Process ia bae i save tekem taem mo bae i afectem olgeta we oli gat raet blong risivim propeti blong man we i ded. From taem we yu faelem wan aplikesen blong rimuvum wan executa/ administreta hemi no save mekem wok blong hem kasem we Kot i tekem wan desisen.
Pawa blong rimuvum wan executa/ administreta
Kot nomo i gat pawa blong rimuvum wan executa/ administreta mo hemia yu save luk long seksen 36 mo 24 blong Queen’s Regulation No. 7 of 1972 we i stap long inglis olsem:
36.The court may for any reason which appears to it to be sufficient, either upon the application of any person interested in the estate of any deceased person or of its own motion on the report of the Registrar and either before or after a grant of probate has been made …………… make an order removing any executor of the Will of such deceased person from office as executor and revoking any grant of probate already made ………..
- The court may, at any time, upon the application of any person interested in the estate or of its motion on the report of the Registrar –
- Revoke the administration already granted; …………………
Loa i talem se Kot i save disaet hem wan blong rimuvum wan executa/ administreta o hemi save disaet tru long aplikesen blong wan man we i gat interes long estet blong man we i ded.
Olsem wanem blong rimuvum wan executa/ administreta
Sapos yu wantem rimuvum wan executa/ administreta yu mas faelem wan aplikesen mo yusum semak kes namba we Kot i grantem Probet o leta blong administresen long hem. Yu mas faelem wan swon statemen wetem apliksen blong yu mo provaedem ol pruf we i shoem from wanem yu tingse executa/ administreta i no fit blong mekem wok blong hem. Yu mas givim copi blong aplikesen blong yu long executa/ administreta mo long olgeta we oli gat raet blong risivim propeti blong man we i ded. Taem Kot i risivim aplikesen blong yu bae hemi listim daon blong harem mo listen long evri evidens bifo hemi save tekem wan desisen. Fes hearing ia bae hemi dipen long aplikesen blong yu. Sapos Kot i luk se hemi impoten blong givim direksen blong givim taem long evriwan blong faelem ol evidens blong olgeta bae hemi mekem olsem.
Sapos yu wan we yu gat raet blong risivim propeti blong man we i ded mo yu luk se executa/ administreta i no mekem gud wok blong hem, hemi gud yu mas gat pruf blong hem so taem yu mekem wan apliksen blong rimuvum executa/ administreta be yu gat evri pruf i stap blong shoem long Kot. Taem yu gat fulap infomesen blong bakemap stori blong yu bae kes blong yu i strong mo yu gat fula janis blong win mo Kot bae i save mekem wan Oda we I rimuvum executa/ administreta.
Wetaem nao Kot i save rimuvum wan executa/ administreta
Kot bae i lukluk wok blong executa/ administreta mo disaet sapos hemi no mekem gud wok blong hem o hemi nomo fit blong mekem wok blong hem olsem executa/ administreta.
Hemia some long olgeta samting we i save mekem Kot i rimuvum wan executa/ administreta:
- executa/ administreta i tekem longtaem tumas blong pem ol kaon mo sherem haf blong estet long olgeta we oli gat raet blong risivim propeti mo hemi nokat wan gudfala explenesen from wanem naoi hemi tekem longtaem tumas;
- executa/ administreta i no toktok wetem olgeta we oli gat raet blong risivim propeti;
- executa/ administreta i nogat wan ripot blong shoem olsem wanem nao hemi sherem propeti blong man we i ded;
- executa/ administreta i stilim estet blong wan we i ded olsem graon we hemi rejistarem long nem blong hem wan o hemi salem graon blong man we i ded mo hemi yusum evri mani ia;
- executa/ administreta i kiaman long benefisiari abaot propeti blong man we i ded;
- executa/ administreta i yusum ol aset blong estet olsem sekuriti long lon blong hem;
- executa/ administreta i tekem mani blong graon mo yusum;
- executa/ administreta i no lukaotem gud ol aset blong estet, hemi no pem propeti tax, hemi salem ol propeti ia olbaot nomo, mo from samting ia ol propeti ia oli go nogud mo lusum value blong olgeta.
Hemi no mata sapos we yu no minim blong mekem gud wok blong yu olsem executa/ administreta o from yu incompeten o yu kealess. Kot i expectem yu blong akt long interes blong ol benefisiari mo mekem sua se yu sherem propeti blong man we i ded folem Loa.
RIMEMBA:Sapos yu wan benefisiari yu gat raet blong askem kwestin long executa/ administreta mo askem blong oli givim pat blong propeti we hemi blong yu. Sapos executa/ administreta i no mekem olsem we yu askem be yu save faelem wan aplikesen long Kot blong rimuvum hem o fosem hem blong i mekem wok blong hem folem Loa.
DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan I andestanem wanem blo mekem.
sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info)