0

RISIVIM PROPETI BLONG MAN WE I DED  (PT 3)

WOK BLONG EXECUTA/ADMINISTRETA

 Long tufala last atikel yumi luk wanem samting blong mekem afta we wan man i ted. Long atikel ia bae yumi lukluk moa long wok blong exectua o administreta. I gat sam toktok we bae yumi yusum long ples ia we yumi bin explenem finis long pat 1 blong ol atikel ia.

 

I gat wan smol difrens long wan executa mo wan administreta be wok blong tufala hemi semak nomo. Difrens hemi olsem wanem tufala i mekem wok blong tufala afta we man i ded. Executa hemi man we nem blong hem i stap long Will blong man we i ted mo wok blong hem hemi blong  sherem propeti blong man ia folem Will ia. Wan administreta hemi man we Kot i givim pawa long hem blong sherem propeti blong man we i ded folem Loa. Wok we executa mo administreta i mekem hemi fri we i minim se tufala bae i no save risivim wan salari long hem.

 

Wok blong wan executa mo wan administreta hemi blong faenemaot evri aset mo liabiliti blong man we i ded mo sherem estet  blong man ia i go long olgeta we oli gat raet blong risivim.

 

Hemia sam long olgeta wok ia:

 

  • Aplae from probet o leta blong administresen. Sapos aplikesen blong probet be executa i mas givim copi blong Will mo list blong ol aset mo liabiliti blong man we i ded. Sapos we hemi wan aplikesen blong leta blong administresen bae administreta i mas tekem copi blong birth Setifiket blong ol pikinini, mared Setificat blong man we i ted, list blong ol propeti blong man we i ded.
  • Faenemaot ol stret man we oli gat raet folem loa blong risivim propeti blong man we i ded.
  • Mekem ol arenjmen blong funerol
  • Faenemaot sapos man we i ded i kat eni akaon long bank, eni graon ( no kastom graon) mo tu sapos man ia i gat kaon.

 

Taem executa/ administreta i faenem evri aset mo liabiliti blong man we i ded hemi mas mekem sua se hemi pemaot ol kaon fastaem olsem:

 

  • Ol expensis blong funerol
  • Ligel expensis
  • Tax
  • Lon/rent
  • Ol bill
  • Eni narafala kaon

 

Executa/ administrate i mas pemaot ol kaon blong man we i ded fastaem afta i jes save sherem wanem we i stap. Samtaem evri mani blong man we i ded i finis i go long kaon mo ol pikinini mo famili blong man we i ded oli no risivim eniting.

 

Sapos man we i ded i gat kaon bae executa/ administreta i save salem ol samting olsem graon mo track blong hem blong pemaot ol kaon ia afta haf we i stap bae hemi sherem long ol famili. Sapos executa/ administreta i yusum mani blong hem blong pemaot kaon blong man we i ded o hemi mekem sam expensis long taem blong wok blong hem bae estet i mas pemback hem.

 

Executa/ administreta i mas mekem ol wok ia quicktaem afta long wan ded mo yumi luk se 1 yia hemi naf blong wan executa/ administreta i save mekem ol wok ia. Be sapos we executa/ administreta i no mekem wok blong hem, olgeta we oli gat raet blong risivim propeti blong man we i ded oli save faelem wan complen i go long Kot. Bae yumi tokbaot topic ia moa long wan narafala atikel.

 

Long ples ia Kot i no save dil wetem ol Kastom graon from hemia Kastom nao i dil wetem. Long Loa, evri pikinini blong man we i ted oli gat semak raet blong aplae. Hemia i no olsem kastom we ol man nao oli gat moa raet over long samting. Eniwan long ol pikinini ia i save aplae from leta blong administresen.

 

Sapos wan executa i no wantem aplae from Probet be hemi mas infomem Kot tru long wan swon statement.

 

Plis tingbaot:taem Kot i givim pawa long wan executa/ administreta blong sherem propeti blong man we i ded i no minim se executa/ administreta i tekem evri propeti ia blong hem.  Pawa we Kot i givim long Executa/ administreta hemi blong sherem ol propreti blong man we i ded. Nao sapos hemi no mekem gud wok blong hem o hemi tekem evri samting blong man we i ted ia blong hem wan nomo be ol man we oli gat raet blong risivim propeti oli save faelem wan aplikesen i go long Kot blong askem long executa/ administreta i explenem wanem nao hemi mekem wetem ol propeti blong man we i ded. Executa/ administreta i save faen o Kot i save mekem wan Oda agensem hem from ol aksen blong hem oli no stret.

 

Sapos yu wan executa/ administreta afta we Kot i givim yu pawa blong sherem propeti blong man we i ded, yu go long ofis blong graon mo askem olgeta oli jenisim nem we i stap long taetol blong graon i go long nem blong yu olsem executa/ administreta. Wan executa/ administreta is save tekemaot mani blong man we i ded o transferem ol be i moa gud hemi openem wan akaon long nem blong hem olsem executa/ administreta mo putum evri mani i go long hem olsem hemi isi blong sheremaot i go long ogeta we oli gat raet blong risivim.

 

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan I andestanem wanem blo mekem.

 

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info)

 

 

Leave a Reply

Your email address will not be published. Required fields are marked *