0

RISIVIM PROPETI BLONG MAN WE I DED (P2)

Long last atikel yumi tokbaot hu nao ol man we oli gat raet blong risivim propeti blong man we i ded mo olgeta we oli save aplae blong askem long Kot i givim raet long olgeta blong sherem propeti blong man we i ded.

 

Long atikel ia bae yumi lukluk long ol difren step we wan executa blong wan Will i mas mekem o taem i nogat Will be man we i tingse hemi stret man blong aplae long Kot i mas mekem. Taem Executa blong wan Will i aplae long Kot yumi talem se hemi aplae from wan Probet. Taem i nogat Will yumi talem se man i aplae from wan Leta blong administresen.

 

Yu mas faenemaot mo gat evri infomesen blong estet blong man we i ded bifo yu aplae from Probet o Leta blong administresen. Ol aplikesen olsem oli isi nomo mo wan man i save mekem hem wan. Be sapos yu no save gud stret samting blong mekem be yu save faenem wan loia blong i faelem aplikesen blong yu. Long Vanuatu fulap long ol aplikesen olsem ol man nomo oli faelem no mata oli nogat loia.

 

Blong faelem wan aplikesen olsem yu mas folem ol rul we i stap long Probate and Administration Rules,long Loa blong Vanuatu.

 

Hemi nid blong gat wan oda blong Kot bifo yu sherem propeti blong man we i ded o nogat?

Nao  yu mas save sapos yu nidim wan oda blong Kot folem Will blong man we i ded o wan leta blong administresen taem i nogat Will.  Seksen 50 blong Queen’s Regulation No. 7 blong 1972 i talem se sapos man we i ded i gat mani long bank be mani ia i no kasem AUD$ 400.00 o VT 34, 000 mo sapos bank i no risivim wan Oda blong Kot we i givim probet o leta blong administresen long executa o administreta fo (4) manis afta long det blong ded, o bank i no risivim notis se wan man i aplae from probet o leta blong administrasen long  taem ia nao bank i save raet i go long Kot mo givim 14 dei notis long Kot blong talemaot se bae hemi givim mani ia long man we i gat raet blong risivim. Jeneral maneja blong bank nao bae i apruvum mo givimaot mani ia.  Sapos Bank i folem ol step ia bae i no save gat man i kam afta mo mekem wan klem agensem bank.

Sapos we man we i ded i gat graon we I stap long joen nem blong hem wetem wan narafala man,  graon ia bae i go stret long nem blong man we i laef i stap. Long kes olsem i no nid blong mekem wan aplikesen from. Narafala man we i laef i stap i mas go long ofis blong graon wetem cetifikat blong ded mo askem olgeta blong oli tekemaot nem blong man we i ded mo rejistarem graon long nem blong hem wan nomo.

Sapos yu no sua se yu nidim wan oda long Kot o nogat, yu save askem advaes long wan loia o go askem infomesen long ofis blong Pablik Solisita.

 

 

 

 

Value blong Estet

Long taem we yu stap priperem aplikesen blong yu, yu nid blong faenemaot stret value blong estet blong man we i ded mo includim long aplikesen blong yu bifo yu faelem.  Value blong estet ia nao bae i talem stret wanem fi yu nid blong pem long aplikesen blong yu.

So yu nid blong lukluk long ol pepa blong man we i ded blong save value blong estet blong hem mo faenemaot sapos hemi gat eni kaon. Sapos yu tingse man we i ded i gat graon, yu mas go long ofis blong graon mo askem blong olgeta oli givim yu copi blong evri graon we oli stap long nem blong man we i ded. Sapos ol graon ia oli stap long mokej bae yu save luk long copi blong taetol we bae ofis blong graon i givim long yu. Blong faenemaot stret value blong gron yu askem wan value blong i valuem mo faelem ripot blong hem long Kot. Yu save askem tu long registra blong Suprim Kot blong faenem sapos i gat eni jajmen agensem man we i ded o sapos we hemi winim wan kes mo jajmen debta i nid blong pem hem. Hemia bae i olsem wan asset long estet blong man we i ded mo we bae executa o administreta i sherem afta we Kot i givim hem wan oda.

Sapos yu save tekem ol bank statemen blong man we i ded hemia tu i gud be sapos nogat yu save gohed blong faelem aplikesen blong yu. Taem Kot i risivim aplikesen ia bae hemi odarem bank blong rilisim ol bank statemen blong man we i ded. Hemia bae i alawem Kot blong faenemaot sapos man we i ded i gat mani long bank. Yu mas faenemaot tu sapos man we i ted i gat wan VNF, laef insurens mo ol narafala semak benefit.

Wok blong man we i aplae hemi blong faenemaot evri aset mo liabiliti blong estet olsem Kot i save olsem wanem blong sherem estet blong man we i ded i go long olgeta we oli gat raet blong risivim ol propeti mo wanem ol kaon we estet  i nid blong pem.

Valuesen blong estet i mas includim:

  • Aset- lis taetol, juelri, track, mani long bank long ol joen akaon, pensen, insurens, share long campani, jajmen
  • Kaon- mokej, lon, Kredit kat, jajmen, bill, expensis blong ded, check we man ia i raetem bifo hemi ted be we oli no cashem yet

 

Valusen blong estet bae i tekem taem folem saes blong ol propeti blong man we i ted. Tekem gud not long hemia from fulap taem hemia nao i stap pulpulum process long Kot. Yu mas givim evri infomesen ia long Kot bifo hemi save mekem wan faenol oda.

 

Ol pepa blong faelem wetem wan aplikesen

 

Ol pepa ia oli save jenis folem aplikesen we yu faelem. Hemia wan list blong ol infomesen we yu mas oltaem faelem wetem aplikesen blong yu sapos yu stap aplae from wan leta blong administresen:

 

  1. Setifiket blong ded we bae yu karem long Civil Status ;
  2. Setifiket blong mared blong ded man, sapos hemi mared long Kastom karem wan Kastom mared setifiket long Malvatumauri kansel blong Jif o sam narafala pruf blong kastom mared blong man we i ded;
  3. Sapos spaos i ted yu mas provadem Setifiket blong ded blong hem;
  4. Birth Setifiket blong evri pikinini blong man we i ded;
  5. Sapos wan long ol pikinini ia oli adoptem hem long loa o long kastom be mas provaedem pruf blong adopsen ia;
  6. Sapos eni naraman i klem se hemi gat raet blong risivim propeti blong man we i ded be hemi mas gat pruf olsem birth Setifiket we i shoem relasenship blong hem wetem man we i ded mo ol pikinini blong hem;
  7. Sapos spaos blong man we i ded hemi laef i stap be i no wantem aplae be hemi mas saenem wan consent blong shoem se hemi givim otoriti long wan naraman blong aplae. Spaos i mas saenem consent ia long foret blong wan comisina blong oath;
  8. Sapos spaos i ded mo man we i aplae hemi wan long ol pikinini be hemi mas karem leta blong consent blong ol narafala brata mo sista blong hem se oli agri blong hemi nao i aplae;
  9. Putum list blong ol aset wetem value blong olgeta mo ol kaon blong man we i ted. Sapos i gat graon be mas putum wan valuesen ripot tu.

 

Sapos yu stap aplae from probet, yu nid blong faelem wetem aplikesen blong yu copi blong Will, Ded Setifiket mo list blong ol aset wetem value blong olgeta mo ol kaon blong man we i ted. Sapos i gat graon be mas putum valuesen ripot tu.

 

Sapos yu no save provaedem wan impoten infomesen long Kot be yu mas explenem long swon stetemen blong yu mo askem sapos Kot i save akseptem wan narafala pruf.

 

Sapos i gat wan Will be executa i no wantem mekem wan aplikesen o hemi ded o hemi kranke o sapos sam long ol propeti blong man we i ded i no stap long Will from hemi jes akwaerem olgeta afta we hemi raetem Will blong hem bae yu faelem aplikesen we oli kolem “ Application for letters of administration with Will annexed” . Aplikesen ia hemi stap long Fom 6 mo yu mas faelem wetem wan swon statement we i shoem list blong ol propeti blong man we i ded.

 

Complitim mo fulumap ol fom

 

Yu save faenem ol fom blong yusum long schedule 1 lo Rule we yumi mentionem long stat blong atikel ia. Yu save tekem wan copi blong ol fom ia tu long Suprim Kot. Aplikesen blong Probet i stap long Fom1 we yu mas faelem wetem wan swon statemen wetem list blong ol propeti blong man we i ded. Long fom ia oli no askem yu blong listim ol kaon blong man we i ted be Kot oltaem hemi askem infomesen ia so hemi impoten blong putum daon.

 

Aplikesen blong leta blong administresen hemi stap long Fom 3 mo yu mas faelem wetem wan swon statemen mo  wan list blong ol propeti blong man we i ded. yu no mas fogetem blong listim tu ol kaon blong man we i ded.

 

Yu mas mekem sua se ol infomesen we yu givim long Kot oli stret mo yu givim evri infomesen we  yu wantem blong Kot i save. Hemi wan ofens blong putum infomesen long swon statemen blong yu we yu save se oli no tru o complit mo yu save faen o go long presin from. Sapos yu gat moa infomesen we yu wantem blong Kot i save be yu mekem sua se yu putum long swon statemen blong yu. Sapos Kot i askem moa infomesen long yu nao yu nid blong providem ol infomesen ia long wan swon statemen mo faelem long Kot.

 

 

Evri samting we yu putum long swon statemen blong yu i mas gat pruf blong hem we yu givim long Kot o we yu faelem wetem aplikesen blong yu.

Sapos yu  no givim evri infomesen we Kot i askem bae aplikesen blong yu i save tekem taem o Kot i save sakemaot. Sapos yu mekem evri samting i stret long fes ples bae yu savem mani mo taem blong yu.

 

Yu mas oltaem faelem 2 copi blong aplikesen blong yu. Wan copi hemi blong Kot mo narafala copi hemi blong yu.

 

Fi blong Aplikesen

Schedule 2 long Rule i talem se sapos value blong estet hemi VT500,000 o moa taem yu faelem aplikesen bae yu pem was fi blong VT50,000. Kot bae i no save akseptem aplikesen blong yu sapos yu nogat mani blong pem fi.

Sapos we value blong estet ia hemi smol long VT500,000 i nogat fi blong pem taem yu faelem aplikesen blong yu.

 

 Wanem bae i hapen afta yu faelem wan aplikesen

 

Afta we yu putum tugeta evri infomesen long wan swon statemen mo faelem wetem aplikesen mo pem fi bae aplikesen blong yu i go long Masta blong Suprim.  Bae Masta i dil wetem aplikesen blong yu long pepa nomo we i minim se yu no nid blong kam long Kot. Be sapos i gat sam samting we hemi wantem tokbaot long yu bae hemi letem yu save tru long wan Oda.  Sapos yu wantem karem wan faenol Oda kwiktaem  yu mekem sua se yu givim evri infomesen we i impoten long estet blong man we i ded blong alawem Kot i mekem wan desisen hariap tu. Afta we Masta i risivim aplikesen blong yu bae hemi sendemaot wan Oda we i askem yu blong advetaes folem Rule. Oltaem Oda ia bae i talem long wanem blong mekem. Sapos yu no savegud Oda blong Masta, yu save askem explenesen long sekretari blong hem. Long semak taem ia bae Ofis blong Masta i priperem ol Oda blong yu tekem i go long bank blong oli save givimaot long yu statemen blong man we i ded.

 

Afta we yu advetaes folem Fom 7 yu mas faelem wan swon statemen mo putum wetem copi blong nius we oli ridim long radio o we yu putum long niuspepa wetem copi blong risit mo ol deit we oli ridim nius ia long hem. Taem Kot i risivim infomesen ia bae hemi wet 28 dei i pass blong luk sapos i nogat man i agensem aplikesen blong yu ale bae hemi mekem wan faenol oda blong Probet o leta blong administresen we i givim raet long yu blong sherem propeti blong man we i ded. Be sapos i gat wan man i agensem aplikesen blong yu bae Kot i listim kes ia mo harem mo bae Kot i letem evriwan i save wanem blong mekem.

 

 

Note:atikel ia i putumaot sam samting we i happen taem yu faelem wan aplikesen mo sapos yu folem bae yu faenem hemi isi nomo. Sapos yu no sua long eni samting yu mas askem long Kot.

 

BE, yu mas traem blong faelem wan complit aplikesen wetem evri infomesen long estet blong man we i ded. Kot i save sakemaot wan aplikesen we i no complit mo yu save lusum  VT 50,000 we yu pem long fi.  Sapos yu wantem faelem wan niufala aplikesen be yu mas pem narafala VT 50,000 bakeken.

 

YU MAS WAES MO MEKEM RAET SAMTING LONG FES PLES

 

 

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan I andestanem wanem blo mekem.

 

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info)

 

 

 

Leave a Reply

Your email address will not be published. Required fields are marked *