Articles

Topic ia hemia bigwan tumas mo bae yumi no save tokbaot evriwan. Atikol ia bae hemi tokbaot nomo ol impoten aspek blong responsabiliti we wan loia i kat i go klaen blong hem mo wanem wan klaen i save mekem taem loia blong hem i no fulfilim responsabiliti ia.  Responsabiliti ia oli kolem “Profesionel etiks”

Olsem wan memba blong ligel profesen, wan loia hemi no wan profesionel nomo we i stap blong representem klaen blong hem be hemi wan ofisa blong Kot tu mo wan sitisen we hemi mas wok folem loa mo semtaem mentenem jastis.

Ligel Praktisina Act (LPA) Chapta 119 long loa blongVanuatu hemi lukluk long admisen blong wan loia i go long Kot mo responsibol bodi we i stap blong disiplinim ol loia sapos oli mekem wan samting i no stret. LPA ia hemi no dil wetem responsabiliti we ol loia oli kat i go long klaen blong olgeta. Be evri loia oli save wanem duti we oli gat i go long wan klaen.

Wan loia i mas oltaem mekem samting folem loa hemia long profesionel sevis blong hem i go long wan klaen mo semtaem long bisnis mo pesonel laef blong hem. Wan loia i no mas yusum save blong hem long loa blong i mekem naraman i fraet o incarejem animan blong mekem samting we i no stret. Wan loia i mas rispektem ligel sistem wea ples hemi stap long hem from ol man we oli wok long ligel sistem olsem ol Jajes, ol Magistret mo ol wokman long Kot. Wan loia i save chalenjem eni aksen we wan ofisel i mekem sapos hemi ting se i no stret folem loa.

Wan loia hemi mas mentenem wan hae profesonel standet oltaem long fasin mo aksen blong hem. Hemi mas shoem se hemi save wok blong hem, hemi mekem gud wok blong hem mo hemi mekem wok blong hem long taem. Loia i no mas kiaman o mekem eni samting we i mekem pubic i lusum trast long hem mo ting daon long administresen blong jastis.

Hemia wan shot list blong duti we wan loia i kat i go long klaen blong hem. List ia hemi blong givim yu wan samari nomo blong ol impoten duti ia.  Wan loia:

• I no mas fraet blong promotem mo protektem intres blong klaen blong hem folem stret fasin blong loa.
• I mas andestanem se sapos wan naraman i pem hem be hemi kat responsabiliti long klaen blong hem be i no long man ia.
• I mas givim klia advaes mo i givim long taem blong i helpem klaen blong hem blong i andestanem ol ligel problem long kes blong hem olsem hemi save mekem ol raet desisen.
• I mas infomen klaen blong hem long evri step blong kes mo i tekem aksen qwicktaem blong mekem se kes ia i finis long taem.
• I mas givim stret fi oltaem long klaen wetem wan list blong ol wok we hemi mekem.
• I mas respektem ol rul mo oda blong Kot mo tekem aksen long taem olsem bae klaen blong hem i no safa.
• I mas kipim sicret evri infomesen we klaen blong hem i givim long hem.
• I no mas tekem wan narafala kes sapos hemi luksave se ol infomesen we hemi tekem long klaen blong hem bae i helpem long niu kes ia.
• I no mas tekem wan klaen sapos hemi kat wan intres long kes blong klaen ia.

Sapos we loia blong yu i no mekem gud wok blong hem mo yu lusum mani o yu safa from aksen we hemi tekem, yu save passem hem long Kot o yu save resem wan complen agensem hem i go long Disiplineri Komiti

Blong passem wan loia long Kot hemi wan bigfala samting. So yu mekem sua se yu karem ol stret advaes long wan narafala loia bifo yu faelem kes blong yu. Be sapos yu wantem resem wan complen agensem hem, yu luk long seksen 8 mo 9 blong LPA we i talem se yu save raetem wan leta i go long secretary mo talem ol samting we yu ting se loia ia i mekem i no stret long kes blong yu.  Sapos we Disiplineri Komiti i faenem se aksen blong loia ia no stret, olgeta oli gat paoa blong:

• Rimuvum loia ia long list blong ol loia we oli kwalifaed blong praktis long Vanuatu.
• Suspendem loia ia blong sam taem.
• Mekem hem i pem wan faen long wan amaont we i no pitim VT 150,000 i go insaet long Revenue Fund.
• Oli odarem loia ia blong i pem complenen long wan amaont we i no pitim VT 150,000.
• Givim wan woning leta long loia ia.

Volume 43 blong ofisel gazet we oli pablishim long 20^thJune, 2018 tru long Oda No. 109 blong  2018 i apoentem olgeta man ia olsem memba blong  Disiplineri Komiti we bae i stap kasem 26^thMaj, 2020:

• Honourable Gus Andree Wiltens, judicial officer nominated by the Chief Justice;
• Frederick John Gilu, a legal practitioner nominated by the Attorney-General;
• Merelyn Tahi, Coordinator, Vanuatu Women’s Centre;
• Sofia Shah, lecturer, University of the South Pacific; and
• David Russet, Bellevue Property Management

Hemi wan bigfala samting blong pasem wan loia long Kot o resem wan complen agensem hem. Yu mas tingbaot se yu stap dil wetem laef mo reputesen blong wan narafala man. Yu mas tingting gud bifo yu tekem aksen ia mo mekem sua se yu kat pruf blong bakemap aksen o complen blong yu.

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan i andestanem wanem blongmekem.

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info)