Articles

Fulap yia nao mi wok long kantri ia mo mi faenemaot se fulap man we oli ded oli nogat Will. Sam oli no wantem gat Will ol narawan oli just no wantem save long hem nomo. Oli no luk save se hemi impoten blong gat wan Will blong mekem sua se ol ting we oli livim bihaen oli go  long man we oli wantem.

 

Long wan atikel bifo yumi tokbaot olgeta we oli gat raet blong risivim propeti blong man we i ded be hemi nogat Will. Yumi luk tu long narafa atikel wanem wok blong wan administreta ( Kot nao i apoentem hem ) mo wan executa (we man we i ded nao i apoentem hem) blong sherem estet blong man we i ded.

 

Wanem ia wan Will?

Wan Will hemi wan ligel document we i shoem list blong ol propeti blong man we i raetem mo nem blong olgeta we bae oli risivim ol propeti ia taem we man ia i ded. Man we i raetem Will i save includim  tu gardien blong ol pikinini blong hem, rikwes blong beriol mo funerol blong hem, eni donasen long ol chariti mo eni trast we hemi wantem setemap.

 

Wanem blong putum insaet long Will

Yu mas apoentem wan executa we hemi wan man we yu trastem blong hemi save mekem wanem we yu raetem long Will blong yu. Executa ia hemi maet wan man o woman mo hemi mas hemi mas gat 21 yia o ova. Wok blong wan executa towods Will hemi fri we i mi se executa i no save risivim wan salari. So hemi gud blong yu mitim man we yu wantem hem olsem executa mo harem tingting blong hem bifo yu putum nem blong hem long Will blong yu. I gud blong putum wan narafala nem insaet long Will tu blong mekem sua nomo se sapos fes executa i ded o hemi kasem wan aksiden mo hemi no save mekem wok blong hem be i gat wan narafala man we i save sherem ol propeti blong yu.

 

Afta we yu save hu ia nao bae hemi responsibol blong sherem ol propeti blong yu, yu mekem list blong evri samting we yu gat olsem graon, house, trak, mani, juwelri mo ol funeja.  Yu save sherem propeti we i stap long pesonel nem blong yu nomo.

 

Naya yu raetem daon nem blong evriman we yu wantem givim samting long olgeta. Olgeta ia i gat spaos blong yu, ol pikinini blong yu, ol nefiu mo nises blong yu o eni narafala man we yu wantem givim wan samting long hem. Semtaem yu mas raetem i klia wanem samting nao bae olgeta i risivim o wanem amaont.

 

Yu maet akwaerem sam propeti afta we yu raetem Will blong yu. Blong mekem se yu no jenisim Will blong yu evritaem yu gat wan niufala propeti yu save includim wan “Residual Clause” we hemi indicatem eni niu propeti we yu akwaerem afta we yu raetem Will blong yum mo talem  hu ia nao bae i risivim ol propeti ia. Clause ia nao bae i alawem executa blong i dil wetem estet blong yu kwicktaem afta yu ded.

 

 

 

 

Wanem ol samting we yu no save putum long Will

I gat sam aset we yu gat be we yu no save putum long Will blong yu.  Ol samting ia i gat:

 

1. Ol aset we oli stap long joen nem blong yu wetem wan narafal man mo i stap long joen propraetoship. Taem yu ded, interes blong yu long propeti ia bae i go otomaticali long man we i laef i stap. Sapos yu gat graon yu save go long ofis blong graon blong faenemaot o afta we yu ded bae executa blong yu nao bae i save go long ofis blong graon blong faenemaot sapos graon ia hemi pat blong estet blong yu o nogat.
3. Kastom graon- longtaem i kam ol kastom graon oli no pat blong estet blong man we i ded from hemi eria we Kastom nomo i dil wetem.

 

4. Laef insurens polisi – hemia wan polisi we yu putum nem blong ol benefisiari blong yu long hem mo taem yu ded bae eni mani blong laef insurens blong yu bae oli pem i go long man ia nao folem Will o Loa.

 

5. Pensen Pemen – Hemi i dipen long pensen we yu gat (long Vanuatu hemi VNPF) mo hemi askem yu blong putum nem blong wan benefisiari we bae VNPF i pem mani blong yu i go long hem taem yu ded. Long ples ia bae pemen ia VNPF i mekem stret I go long man ia mo i no save folem Will o Loa.

 

 

6. Share long Campani– folem ol agrimen blong onaship blong ol share ia mo olsem wanem bae oli distributim taem yu ded bae oli save diteminim sapos oli fom pat blong estet blong yu o nogat.

 

Olsem wanem blong raetem wan Will

 

Long fulap kantri ol Loia nao oli stap raetem ol Will. Long Vanuatu i nogat ligel rikwaemen blong wan loia i priperem wan Will.

 

Yu save askem ligel advaes blong raetem Will blong yu o askem long wan loia i raetem Will blong yu olsem yu sua se Will blong yu I folem loa. Loia ia bae i raetem Will blong yu nomo mo bae yu saenem. I no mata sapos yu raetem Will blong yu o wan loia i raetem, yu mekem sua se Will blong yu oli raetem i folem loa.

 

Blong mekem sua se Will blong yu i satisfaem ol rikwaemen blong loa yu save luk long

Wills Act, Chapter 55 blong  Revised Laws of Vanuatu 2006 we i talem se:

 

1. Yu mas han raetem Will blong yu o typem. Wan Will hemi no valid sapos yu ricodem o yu tekem pija blong hem.

 

2. Yu mas saenem o putum mak blong finger blong yu long end blon evri pej blong Will blong yu includim las pej.

 

3. Bae i mas gat tu (2) man i witnisim will ia. Yu maet wantem gat ova long tu ( 2) witnis be yu no save gat wan (1) nomo.Loia blong yu i save akt olsem wan witnis long Will blong yu.

 

4. Ol witnis blong yu bae oli mas saen long end blong evri pej blong Will blong yu kolosap long sikneja blong yu includim last pej. Long last pej ol witnis ia oli mas putum adress blong olgeta mo aelan blong olgeta long hem.

 

5. Yufla evriwan wetem ol witnis blong yu i mas saenem Will ia long semak taem.

 

6. Yu mas letem ol witnis blong yu oli save se oli stap saenem wan Will be olgeta oli no nid blong save wanem nao yu raetem insaet long Will blong yu.

 

 

Ol Witnis

 

Ol witnis  ia oli mas :

1. Gat 21 yia o ova.
2. Oli save tingting stret mo oli no ol man we oli tingting olsem pikinini.
3. Long taem we oli saenem Will oli no save se oli benefisiari blong Will
4. Save saenem nem blong olgeta.

 

Impoten: sapos yu wan witnis mo long taem we yu saenem Will yu save se yu wan benefisari , Will hemi still valid be yu bae yu lusum raet blong yu olesm wan benefisari long Will ia.

 

Rivokem Will blong yu

 

Blong rivokem Will blong yu, yu save distroyem o yu mekem wan niufala will we bae i otomaticali replasem fes Will blong yu.

 

Sapos yu mekem wan will mo afta yu mared, be mared blong yu i otomaticali rivokem Will blong yu. I minim se yu nid blong raetem wan niufala Will bakeken.

 

Wanem blong mekem afta yu raetem wan Will

 

I nogat use blong raetem wan Will mo haetem mo taem yu ded i nogat man i save abaotem will ia mo bae ol man oli no save olsem wanem nao yu wantem sherem ol propeti blong yu.

Blong mekem sua se hemia i no hapen, yu save mekem wan long tufala samting ia:

 

1. Putum Will blong yu long wan sef ples mo letem executa blong yu o wan man we yu trastem i save . Olsem taem yu ded be oli save faenem o yu save givim ol copi blong Will blong yu long tufala; o

 

2. Yu save sendem wan copi blong Will blong yu i go long Registra blong Suprim Kot o givim long komisina blong ples we yu stap long hem blong givim long Registra.

 

 

 

 

Wanem i hapen afta we yu ded

 

Taem we yu ded Comisina blong area blong yu bae i contaktem Registra blong Suprim Kot blong faenem sapos yu givim Will blong yu long hem. Sapos Registra i nogat Will blong yu  bae Comisina  i save askem long ol famili blong yu blong faenemaot sapos yu raetem wan Will.

 

Sapos i gat wan Will bae Comisina i tekem mo givim 7 dei notis long executa o olgeta we nem blong olgeta i stap long Will olsem executa mo evriwan we oli gat wan intres lon estet blong man we i ted abaot deit mo taem we bae oli ridim Will ia long Kot long area we yu stap long hem.

 

Afta we oli ridim Will ia bae executa i tekem mo stat blong sherem propeti folem wanem we i stap long Will.

 

Bae yumi jes luk long wan narafala atikel olsem wanen nao bae Executa i mekem ol wok blong hem.

 

Penalti blong hidem wan Will

 

Eniwan we i hidem wan Will o i save se i gat wan Will be i no wantem talemaot ples we  i stap long hem long Comisina blong area blong man we i ded hemi save faen long VT 20,000  o go long prison blong 6 manis o hemi save faen mo go long prison semtaem.

 

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan I andestanem wanem blo mekem.

 

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info)