0

OLSEM WANEM BLONG KLOSEM DAON WAN KAMPANI

Long atikel blong las wik yumi luk sam kwestin abaot olsem wanem blong klosem daon wan kampani. Long wik ia bae yumi luk long ol step blong tekem sapos wan man i wantem klosem daon wan kampani mo luksave wanem ol step we narafala man i save tekem agensem kampani sapos hemi klosdaon.

Blong save moa long ol prosess blong klosem daon wan kampani jekem

“Companies (Insolvency & Receivership) Act No. 3 of 2013 mo “Regulation Order No. 111 of 2015”.

Seksen 15(2) i shoem se Kot i save apoentem wan man blong i lukaotem ol samting blong kampani, sapos hemi luk se:

  • Kampani i nomo save pem ol kaon blong hem; o
  • Wok blong Kampani o ol darekta blong kampani i no folem loa; o
  • Hemi moa gud blong klosem daon kampani ia.

Seksen 15 long loa blong kampani i talem hu nao i save faelem wan aplikesen blong klosem daon kampani:

  1. Kampani; o
  2. Wan darekta blong kampani; o
  3. Wan sheholda blong Kampani; o wan kredita blong kampani; o
  4. Rejistra blong Kampani.

Bifo Kot i mekem wan oda folem seksen 15, man we i wantem klosem daon kampani bae i mas faelem wan klem long fom 3. Fom ia i stap long schedule 3 insaet long “Regulation Order No. 111 of 2015”. Klema ia i mas faelem tu wan notis blong prosiding long fom 5 we i stap long schedule 3. Notis blong prosiding oltaem oli faelem wetem wan swon stetemen we i sapotem klem. Klema i save saenem swon stetemen o narafala man i saenem olsem darekta blong kampani we hemi savegud stori  blong klem ia.

Klema o loia blong hem nao bae oli saenem notis blong prosiding. I mas gat wan memorandum we Rejistra blong kampani i saenem (wan sampol blong memorandum ia yu save faenem long schedule 3 blong Regulesen blong Kampani) wetem notis blong prosiding ia. Mekem sua se taem mo ples we Kot bae i harem kes ia i stap long notis blong prosiding mo long memorandum.

Afta, sevem Kampani wetem wan copi blong klem, swon stetemen, notis blong prosiding mo memorandum ia. Mekem sua se oli putum aot pablik notis blong klem ia 7 dei bifo deit we Kot bae i harem kes ia.  Fom blong pablik  notis ia yu save faenem long schedule 3.

Pablik notis blong klem i mas gat:

  1. Dei we oli faelem klem ia long hem;
  2. Nem mo adress blong klema o sapos we klema i gat wan loia be putum adress blong loia ;
  3. Adress blong sevis blong klema;
  4. Ples, deit mo taem we Kot bae i harem kes ia long hem;
  5. Talem se eniwan we i wantem luk Klem mo swon stetemen hemi save go luk long Rejistri blong Suprim Kot o go long adress blong sevis blong klema;
  6. Indiketem se eniwan we i wantem pat long kes hemi mas faelem wan aplikesen blong pat long kes tu (2) dei bifo deit we bae Kot bae i sidaon blong harem kes ia.

Sapos we pablik notis i no go aot o pablik notis ia oli putumaot be hemi no folem rul mo oli no sevem Kampani wetem, olsem difenden long kes, bae Rejistra blong Kot i save cancelem deit we i stap long list blong Kot i harem kes mo tekemaot kes ia o Kot bae i save givim dareksen long hao blong gohed wetem kes ia.

Afta we difenden i risivim klem ia, hemi gat fotin (14) dei blong faelem difense blong hem. Eniwan we i wantem pat long kes i mas faelem wan “appearance”we hemi stap long fom 11 long schedule 3 blong indiketem se hemi wantem pat long Kes mo talem sapos hemi sapotem o agensem klem. Mo hemi mas faelem notis blong pat long klem 2 dei bifo deit we Kot bae i sidaon blong harem kes ia long hem.  Sapos difenden i no faelem wan difense o man we i intres blong pat long kes be i no faelem wan notis blong pat long kes bae hemi no save atendem kes unless Kot i givim hem wan extensen blong faelem ol dokumen blong hem.

Sapos kredita o klema i pruvum klem blong hem bifo long Kot bae Kot i mekem wan oda blong klosem daon kampani.

Bifo Kot i harem kes, hemi posibol blong faelem wan aplikesen mo sapotem wetem ol gudfala risen blong askem kot i saspendem kes ia. Eniwan we i wantem faelem wan Kaen aplikesen olsem, hemi mas faelem 21 dei afta we hemi risivim klem.  Hemi save aplae blong askem se oli no putumaot pablik notis blong klosem daon kampani o pablishim eni narafala infomesen blong klem mo askem long Kot blong saspendem klem blong klosem daon kampani ia fastaem.

Olgeta we oli save faelem apliksen ia hemi:

  1. Kampani, olsem difenden;
  2. Wan kredita blong Kampani we i risivim pemisen blong Kot;
  3. Rejistra blong Kampani.

Prosess blong klosem daon wan kampani hemi save tekem taem mo hemi Kompliketed so hemi gud blong askem advaes long wan loia blong i assistim yu.

Nekis wik bae yumi lukluk long rol blong “liquidator” afta we kot i mekem wan oda blong klosem daon wan kampani.

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan I andestanem wanem blo mekem.

 

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info

Leave a Reply

Your email address will not be published. Required fields are marked *