Articles

Wikipedia i difaenem kontemp blong Kot olsem wan fasin blong no rispektem kot mo mekem ol aksen we yu save se oli no rispektem Kot o ol ofisa blong Kot.

I gat tu (2)taep blong kontemp:

• Taem wan man i no rispektem ol ofisa blong Kot insaet o aotsaet long Kot; mo
• Taem wan man i no folem wan oda blong Kot.

 

Pat 18.13 and 18.14 blong Civil Procedure Rules 2002 mo Chapta 135, Seksen 82 blong Penal Code blong Vanuatu i alawem Kot blong i dil wetem ol issue blong kontemp we i hapen long Kot.

 

Kontemp Bong Kot hemi serius?

Wan Kontemp hemi wan serius mata. Sapos oli faenem se aksen blong yu hemi kosem kontemp blong Kot bae yu save faen o Kot i save putum yu long prisen from.

 

Wanem ia kontemp long fes blong Kot?

 

Kontemp long fes blong Kot hemi minim eni aksen we i no folem fasin blong rispekt mo we man i mekem long foret blong Jaj o we Jaj i no luk be i hapen long yad blong Kot folem wan kes.

 

Wanem bae i happen sapos oli faenem se aksen we yu mekem hemi wan kontemp blong Kot?

Kot i save jajem yu from Kontemp o wan man o wan loia i save faelem wan aplikesen blong kontemp agensem yu o yu save faelem wan aplikesen blong kontemp agensem wan narafala man. Kot mas givim wan opotuniti long man we aplikesen ia i agensem hem blong i defendem hem wan bifo hemi save mekem wan desisen. Sapos we Kot i faenem se aksen blong yu hemi wan kontemp blong Kot bae hemi panisim yu. Kot i save mekem sam narafala oda tu agensem yu. Kot i save mekem yu faen o  i sendem yu go long prisen o hemi save mekem wan oda we i go agensem kes blong yu o i stopem yu blong mekem sam samting we bae i save spolem kes blong yu afta.

 

Wanem nao i fomem wan Kontemp?

Kontemp hemi aksen blong wan man we i mekem wan samting we Kot i stopem hem blong mekem o i no wantem mekem wan samting we Kot i askem hem blong mekem. Kontemp hemi wan samting we i save hapen long Civil Kot mo long Kriminal Kot tu.

Hemia hemi sam exampol blong kontemp:

• Yu dressap o yu toktok long wan wei we i shoem se yu nogat rispekt long Ko.
• Taem wan witnis i stap toktok be yu stap shoem i klia nomo se yu agri o no agri wetem hem o yu laf taem witnis i stap toktok o yu tanem ae blong yu taem Jaj o narafala man i stap toktok o yu tanem yu taem Jaj i stap toktok.
• Taem yu risivim wan samone be yu no wantem kam long Kot.
• Yu no wantem obei long wan oda blong Kot.
• Yu gohed blong toktok taem we taem blong yu blong toktok i pass finis.
• Yu stap gohed blong givim ol pruf we Kot i sakemaot.
• Yu stap harassem narafala man insaet long Kot.
• Yu no wantem stanap taem Jaj i kam insaet long Kot o taem Jaj i stap go out long Kot.
• Yu swea long wan Jaj, wan ofisa blong Kot o wan witnis.
• Yu stopem Kot blong no harem wan kes.
• Yu no askem pemisen blong Kot be yu yusum mobael fon o wan narafala samting blong ricodem wanem we i stap hapen insaet long Kot.

 

 

NOTE:  Kot i save jajem eniwan from Kontemp i no mata we yu wan Loia, wan man o wan Kampani.

 

Wanem nao ol difren panisman blong Kontemp blong Kot?

 

Sapos we Kot i jajem yu long kontemp long wan civil kes bae Jaj i save odarem yu blong pem wan faen o hemi save putum yu long prisen blong sam taem. Sapos hemi wan kamapni bae Kot i save mekem wan oda blong holemtaet ol propeti blong kampani ia o hemi save rilisim yu wetem sam kondisen

 

Panisman blong kontemp long Penal Code hemi 5 yia long prisen. Sapos we kontemp ia i happen long fes blong Kot bae Kot i save holemtaet yu mo mekem yu faen long VT 5,000.

 

Olsem wanem blong dil wetem kontemp?

Sapos we Kot i luk se yu comitim kontemp long fes blong hem bae hemi talem long yu olsem wanem nao yu comitim kontemp ia mo givim yu wan janis blong difendem yu wan mo talem from wanem bae Kot i no mas panisim yu. Nao yu mas talem stret from wanem yu akt olsem mo gat wan gufala risen blong akt olsem mo askem long kot blong i sore long yu. Sapos yu nogat wan gudfala risen be yu talem stret long Kot mo askem sore long Kot mo promes blong nomo mekem fasin olsem. Sapos Kot i luksave se yu rili sore mo hemi fes taem we yu mekem olsem bae hemi save fogivim yu. Be sapos we yu stap akt olsem fulap taem finis bae hemi hat lelebet long Kot blong i bilivim yu.

 

Sapos wan narafala man long kes i talem se yu comitim kontemp be hemi wan sevem yu wetem wan copi blong submisen blong hem. Bae yu gat taem blong priperem wan riplae mo bae Kot i lukluk long hem bifo hemi mekem wan desisen.

 

RIMEMBA:I no mata sapos yu stap insaet o aotsaet long Kot be yu mas rispektem Kot, ol ofisa blong Kot mo ol narafala man we oli involve long kes blong yu mo rispektem ol oda blong Kot. Sapos yu akt olsem bae neva yu gat problem wetem kontemp long Kot.

 

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan I andestanem wanem blo mekem.

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info