Articles

Long ol lasfala atikel yumi tokbaot olsem wanem blong klosemdaon kampani blong yu o yu stap wantem askem long Kot blong i klosemdao wan kampani sapos we kampani ia i nomo gat mani blong pembak ol kaon blong hem o hemi nomo save kontinu blong mekem bisnis.

Long atikel ia bae yumi luk olsem wanem blong klosemdaon wan kampani we o nomo wantem kontinu blong mekem bisnis.

I gat wan prinsipol blong loa we i alaowem blong klosemdaon wan kampani folem “just mo equitable” rul.

Seksen 15 blong “Companies (Insolvency & Receivership) Act” hemi rid olsem:

• Kot i save apoetem wan “liquidator” folem wan aplikesen we i kam from:
• Kampani; o
• Wan Darekta blong kampani; o
• Wan sheholda blong kampani; o
• Wan kredita blong kampani….; o
• Rejistra blong kampani.

• Kot i save apoentem wan “liquidator” sapos hemi satisfae se:
• Kampani i nomo save pembak ol kaon blong hem ; o
• Kampani o ol darekta oli kontinu blong brekem loa; o
• Hemi stret nomo blong Kampani ia i go long “liquidation”.

Long atikel ia bae yumi lukluk moa long sabseksen (2) (c).

Loa i no talem stret mining blong “just” mo “equitable” be hemi talem wanem we Kot i mas tingbaot taem hemi harem wan kes blong klosemdaon wan kampani folem prinsipol ia. Nao from i nogat wan loa we i tokbaot prinsipol ia, blomg mekem wan desisen, Kot i mas go luk long ol semak kes olsem we oli disaetem bifo finis mo luk olsem wan oli aplaem prinsipol ia.

Prinsipol blong “just” mo “equitable” hemi jenis folem kes we i stap kam bifo long Kot.  Taem we Kot i sidaon blong harem wan kes blong klosemdaon wan Kampani bae hemi mas listen long evri ditel bifo hemi save mekm wan desisen. From risen ia, eniwan we i wantem kam long Kot blong askem blong i klosemdaon wan Kampani hemi mas mekem sua se hemi gat wan strong kes fastaem.

Hemia samfala samting we Kot  i lukluk taem we hemi karem ol kes blong klosemdaon wan kampani:

1. Sapos i gat mismanejmen long bisins olsem fraud.
2. Ol memba blong kampani ia oli raorao mekem se oli nomo save kontinu blong ranem bisnis.
3. Maet i gat sam samting we i hapen long pesonal o profesional laef blong memba we i mekem se oli nomo save ranemgud kampani mo oli lusum trast long olgeta wanwan.
4. Sapos we i gat sam impoten issue blong kampani ol memba oli no save kasem wan agriemen blong olsem wanem nao bae oli ranem o extendem Kampani.
5. Sapos we i gat mismanejem long mani blong kampani mo samting ia i brekem trast blong ol narafala memba blong kampani. Sapos we i nogat gudfala desisen long olsem wanem blong spendem mani kampani o spendem mani long ol samting we oli mekem kampani i lusum profit.
6. Kampani i nomo mekem bisnis we hemi setap from. Wan exampol hemi taem wan kampani i setap blong salem graon be afta oli salem computa.
7. Samtaem ol sheholda/darekta oli nomo wantem ranem bisnis blong kampani mo maet oli wantem klosemdaon mo salem afta bae oli risivim ol shea blong olgeta. Wan exampol hemi taem Kampani i stap operet long wan longfala taem mo ol sheholda mo darekta oli wantem salem kampani mo ritae.
8. Wok blong ol darekta mo sheholda hemi kwestenabol.
9. Ol man we oli ranem bisnis ia oli kroskros long olgeta.

Hemia samfala exampol blong ol kes we  taem i kam long Kot, Kot i save mekem desisen blong klosemdaon kampani. Be hemi impoten blong save i gat moa risen we i save mekem Kot i disaet blong klosemdaon wan kampani mo sapos kes blong yu i no stap long list ia hemi no minim se yu nogat wan kes.

Hemi impoten blong rimembarem se maet yu gat wan gud risen blong askem long Kot blong i klosemdaon wan Kampani be i gat tu impoten samting we yu mas shoem long Kot:

1. Se rilasenship blong ol man we oli setemap bisnis hemi impoten. Yu mas shoem long Kot se kampani ia i setap tru long gudfala rilesenship we ol memba oli gat mo we oli gat trast mo konfidens long hem. Ol kaen rilesenship we yumi tokbaot long ples ia hemi olsem rilesenship blong wan man wetem man woman blong hem o ol relensenship we yu faenem long wan brata mo wan sista o ol fren. Nao sapos wan samting i rong long rilasenship ia bae hemi afectem profesional administresen blong Kampany; mo
2. Sapos we rilesenhip ia i brokdaon bae hemi save kosem sam serious consekuens long kampani. O yumi save talem se gud blong kampani i dipen long trast mo koperasen blong ol memba. Nao sapos olgeta oli nomo save wok tugeta from gud blong kampani be hemia bae i afectem gudfala administresen blong kampani tu.

Atikel ia hemi givim yu wan tingting nomo  be sapos yu tingse yu gat wan kes o wan man i faelem wan aplikesen blong klosemdaon kampani blong yu, i gud yu askem advaes long ol man we oli save long area blong loa ia.

DISCLAIMER – This is a legal column to provide basic information on the law and court procedure. It is not to be used as a substitute for legal advice but to be used only as a starting point in understanding what you might need and what you might need to do.     

If you have any questions or require clarification on the above please contact the writers at vanuatulaw@gmail.comor contact us at website www.pawthelaw.info 

FOR BISLAMA VERSIONS OF OUR ARTICLES, VISIT OUR WEBSITE WWW.PAWTHELAW.INFO.