Articles

Wan man taem hemi setemap wan kampani hemi harem gud from hemi wantem salem ol samting blong hem o hemi wantem ofrem wan sevis i go long ol naraman. Be i gat taem we ol samting oli no wokaot olsem we hemi stap plan long hem mo i gat sam samting we hemi mas mekem long bisnis. Wan long olgeta samting ia nao hemi desisen blong   klosem daon kampani o Kot i save mekem wan oda blong klosem daon kampani ia.  Bae yumi traem blong givim wan smol explenesen long sam kwestin we yu maet gat. Bae i gat tu moa atikel we bae i kam afta blong tokbaot olsem wanem nao wan man i save involv long prosess o sapos wan man i wantem pat long prosess ia.

Wanem nao “winding-up” blong wan kampani?

“Winding-up” hemi prosess blong klosem daon wan bisnis. Hemia i minim se bisnis bae i salemaot ol asset blong hem blong pemaot ol kaon blong hem. Mo sapos i gat haf mani i stap bae hemi save sherem long ol sheholda.

Wanem i hapen taem kampani ia i“wind-up”?

Taem kampani i statem prosess blong “winding-up”hemi minim se kampani i mas salem ol  aset blong hem olsem graon,  track mo ol narafala samting blong hem blong pemaot ol kaon blong hem mo  salari blong ol wokman.

“Liquidation” blong wan kampani hemi difren long “windin-up”blong wan kampani? 

Toktok ia  ‘winding-up’ mo ‘liquidation’ hemi tufala toktok we oli minim semak samting nomo. Oli yusum olsem, wan kampani hemi “wind up”mo ol asset blong hem oli “liquidated”. Hemia i minim nomo se binis bae i klosdaon mo i stap stat blong salemaot ol aset blong hem.

 

 

Wanem ol difren taep blong “winding-up”?

Ol taep blong winding up: (1) involuntary winding-up mo (2) voluntary winding-up. Involuntary winding-upi minim se kampani i nomo save pembak ol kaon blong hem o kaon blong kampani i bigwan bitim value blong ol asset blong kampani.

Voluntary winding-up hemia taem we ol sheholda oli desaet blong klosem daon kampani. Ol sheholda oli maet disaet olsem from oli luk se i nogat inaf mani blong pembak kaon blong kampani o oli wantem salem ol asset blong kampani mo sherem mani blong olgeta mo mekem wan narafala samting.

Wanem i hapen long wan sheholda taem kampani i klosdaon?

Taem we wan kampani i “wind up”, fes samting we oli pem hemi ol kaon blong kampani. Afta taem i gat haf mani i stap bae oli pem i go long ol sheholda (olgeta we oli gat shea long kampani) folem valu blong shea blong olgeta.

 

Hu ia i responsibol taem wan kampani i klosdaon?

Loa i luksave wan kampani se hemi gat semak raet olsem wan man. So taem wan kampani o klosdaon bae hemwan i risponsibol blong pemaot ol kaon mo ol narafala risponsabiliti we hemi gat.

 

Wan darekta hemi risponsibol blong pembak kaon blong kampani?

Wan darekta hemi no risponsibol blong pembak kaon blong kampani. Wan darekta hemi seperet long kampani mo from samting ia bae kampani i mas salem ol asset blong hem blong pembak kaon blong kampani. Darekta bae i risponsibol nomo sapos kampani i save pruvum se darekta ia i komitim wan fraud long kampani.

Hu nao bae oli pem hem fes wan taem wan kampani i klosdaon?

Ol fes man blong pem taem wan kampani i klosdaon hemi ol kredita ( ol man we kampani i gat kaon long olgeta) folem wan oda. I gat ol bank we oli kam anda long ol “secured Creditors” folem wetem ol “unsecured creditors”hemia olsem ol nara kampani we kampani we i stap long prosess blong klosdaon i  pem sam samting long olgeta be hemi nogat wan sekuriti agensem ol samting ia. Afta we kampani i pem evri kredita mo sapos i gat haf mani i stap nao bae hemi save pem ol sheholda.

 

Sapos we wan kampani i stap long stej blong “liquidation”bae hemi save kontinu blong ranem bisnis?

Sapos wan kampani i gat mani blong pem ol kaon blong hem bifo hemi go long stej blong “liquidation”hemi stil save gohed blong mekem bisnis kasem we oli complitim prosess blong “windind-up”.

Be sapos we kampani i nomo gat mani blong pembak ol kaon blong hem mo hemi gohed blong mekem bisnis bae hemi inkrisim level blong kaon mo bae ol darekta oli save responsibol blong pembak kaon ia. From taem we kampani i nomo gat mani be i gohed blong mekem bisnis hemia i putum kampani long wan rabis faenensol posisen.

 

Mi save tekembak mani blong mi sapos wan kampani i go long “liquidation”?

Yu save tekembak mani blong yu sapos  kampani i stil gat mani bifo hemi klosdaon.

Be sapos long taem we kampani i klosdaon hemi nomo gat mani blong pembak ol kaon blong hem hemi posibol se bae yu no save tekembak mani blong yu sapos yu wan “unsecured” credita. Wan wei blong yu save tekembak mani blong yu hemi blong yu mekem wan aplikesen mo askem long Kot blong mekem wan oda blong bankraptem kampani ia. Be prosess ia bae hemi hard lelebet from hemi folem olfala loa we yumi gat long Vanuatu. Sapos yu wantem mekem wan aplikesen olsem yu mekem sua se yu jekem gud amaont blong mani we yu stap aftarem. From samtaem ligel fi blong ol aplikesen olsem i sas pitim mani we yu stap askem sapos Kot i mekem wan oda blong bankraptem kampani ia.

Blong karem moa advaes long saet blong bankraptem wan kampani yu mas go luk wan loia we i save gud long loa blong “bankruptcy”blong hemi asistim yu. Wan loia we i no save gud prosess blong “bankruptcy”bae i pulpulum kes ia i go longtaem mo mekem bae yu lusum moa mani.

******

Blong moa advaes yu save kontaktem wan loia.

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan I andestanem wanem blo mekem.

 

YU SAVE RIDIM OL ATIKEL IA LONG BISLAMA LONG WESBAET BLONG MIFALA LONG WWW.PAWTHELAW.INFO.  

 

sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info