0

INFOSEM WAN JAJMEN

Sapos yu winim wan kes bae Kot i putum daon long jajmen wanem nao bae man we i luss long kes ia bae i pem i go long yu mo taem we bae man ia i mas mekem pemen long hem. Be sapos we Kot i no putum wan stret taem, i no minim se bae i nogat pemen. Nao sapos man we i lussum kes ia i stap tekem longtaem blong pem yu, yu save mekem wan aplikesen mo askem long Kot blong infosem jajmen ia.

 

Long ol infosmen kes yumi kolem man we i winim kes, jajmen kredita, mo man we i lussum kes jajmen debta

 

Yu save faenem rul we i dil wetem infosmen blong wan jajmen long Rule 14 blong Civil Procedure Rules 2002 (CPR)

 

 

I kat 3 step long wan infosmen:

 

  1. Afta we Kot i givimaot wan jajmen be i no putum taem blo mekem pemen, Kot i save putum kes ia daon blong wan informen konfrens stret afta we i tekem wan desisen. Be sapos Kot i no putum wan deit yu no loia blong yu i save mekem wan aplikesen i go long Kot blong askem se Kot i putum kes ia daon blong wan infosmen konfrens. Taem we Kot i risivim aplikesen ia bae hemi putumaot ol notis blong letem jajmen kredita i save wetaem bae Kot i harem aplikesen ia mo bae Masta blong Kot nao i harem aplikesen ia. Bae jajmen debta i risivim wan samon we  i askem hem blong kam long Kot long deit ia wetem ol pepa we oli shoem ol expensis mo inkam blong hem olsem salari slip, bank akaon, bill blong wota mo laet, loan, recit blong rent mo  eni narafala pruf we i shoem ol inkam mo expensis blong hem long wan manis. Evri samon i gat woning.  Hemia bae hemi wonem jajmen debta se sapos hemi no kam long Kot long taem ia, bae Kot i save mekem wan oda blong polis is arestem hem mo tekem hem i kam long Kot. Long taem blong infosmen konfrens ia, bae Kot i givim taem long jajmen kredita o loia blong hem blong askem kwestin long jajmen debta blong faenemaot olsem wanem nao bae hemi pembak amaont we Kot i givim long Jajmen kredita. Kot tu i save askem kwestin long jajmen debta.

 

  1. Sapos Kot i luk se jajmen debta i save pembak ful amaont ia wantaem o i save pembak smolsmol kasem i pembak ful amaont bae hemi mekem wan oda we oli kolem wan infosmen oda mo bae hemi folemap kes ia kasem jajmen debta i pembak ful amaont. Be sapos we Kot i luk se jajmen kredita i no save pemback amaont ia bae hemi no save mekem wan oda blong pemen be jajmen kredita i stil gat raet blong kambak long Kot taem we hemi fanemaot se faenensol situesen blong jajmen debta i jenis mo hemi stap long wan faenensol posisen naya we hemi save pembak kaon blong hem.

 

 

  1. Sapos Kot i mekem wan oda blong pemen be jajmen debta i no mekem pemen o i stap mekem pemen be i no folem oda blong Kot, jajmen kredita i save mekem wan aplikesen mo askem wan Infosmen Warenlong Kot.

 

Blong pemback jajmen kredita, wan Infosmen Waren i givim hem aksess long mani o samting blong jajmen debta.

 

Taep blong ol waren

 

Hemia ol mein taep blong Infosmen Waren:

  • Holemtaet properti mo salem
  • Redirectem inkam
  • Redirectem ol kaon

 

Ol narafala taep blong Infosem Waren i includim:

  • Eviksen
  • Posesen blong graon
  • infosem oda agensem ol stok, shares, alaowens o garenti long wan kampani
  • givimaot ol samting we jajmen debta i yusum blong mekem mani long hem

 

Aplae from wan Infosmen Waren

 

Evri fom blong infosmen prosiding yu save faenem long Schedule 3 blong Civil Procedure Rules 2002.  Fom blong yusum blong faelem wan Aplikesen blong askem wan Infosmen Waren hemi fom 25.

 

Blong ol narafal taep blong Infosmen Waren, yu save faelem folem ol form ia:

  • Infosmen Waren blong wan oda blong mani- fom 22
  • Infosmen Waren blong wan narafala oda blong Kot- fom23
  • Infosmen Waren blong wan oda blong redirectem inkam- fom 26

 

I nogat rikwaemen blong jajmen kredita i mas letem jajmen debta i save se hemi stap aplae from wan Infosmen Waren.

 

Jamen kredita i mas faelem aplikesen blong hem folem Rule 14.12 blong CPR we i includim:

  • Aplikesen we i stap long fom 25,
  • Copi blong Infosmen Oda we Masta o Jaj i mekem
  • 2 copi blong taep blong Infosmen Waren we yu stap askem
  • Wan swon statemen we i setemaot:
    • Deit blong Infosmen Oda
    • Amaont we Kot i givim long Oda
    • Deit mo amaont blong eni pemen we i stap long Oda
    • Kost blong ol last infosmen prosiding
    • Interes we i diu long deit blong statemen
    • Eni narafala infomesen we i save help blong wokemaot amaont blong pem long infosmen oda long deit blong statemen o olsem wanem nao yu kasem amaont ia
    • Wanem amaont blong interest everidei
    • Eni narafala infomesen we i impoten long Infosmen Waren

 

 

Sapos Infosmen Waren ia hem blong holemtaet wan graon o trak mo salem bae yu mas submitim tu copi blong taetol wetem last valuesen blong hem mo rejistrasen buk blong trak ia we i shoem  jajmen debta olsem ona blong hem.

 

Yu mekem sua se yu includim ol infomesen blong jajmen debta olsem nem blong hem, telefon namba blong hem mo ples we hemi stap long hem long Infosmen Waren ia. Ol infomesen ia bae i helpem sheriff bigwan taem i kam long taem blong execusen.

 

Afta we yu applae

 

Kot bae i lukluk Aplikesen blong yu mo bae hemi save grantem o refiusum. Sapos Kot i refiusim Aplikesen blong yu, bae hemi givim ol risen from wanem hemi mekem desisen ia. Yu save aplae bagegen from wan Infosmen Waren be hemia i dipen nao long risen from wanem Kot i rifiusim Aplikesen blong yu long fas ples.

 

Taem blong aplae

Yu gat 6 yia afta we Kot i givim wan jajmen long yu blong aplae from wan Infosmen Waren blong.  Be sapos 6 yia i pass be yu no mekem wan aplikisen, nao yu mas mekem wan narafala aplikesen blong askem long Kot i letem yu blong aplae from wan Infosmen Waren. Yu mas givim risen from wanem yu no bin aplae long taem.

 

Sapos Kot i grantem aplikesen blong yu bae Masta o wan Jaj i saenem mo givim long Sherrif blong executim. Infosmen Waren we i dil wetem graon i laef blong 1 yia mo Infosmen Waren we I dil wetem trak o eni narafala samting we i no graon hemi laef blong 6 manis nomo.

 

Wan Infosmen Waren blong  tekemback wan graon o evictim sam man aot long wan graon hemi laef abaot 3 kasem 6 manis. Be Kot i save givim moa o smol taem long of taep blong Infosmen Waren ia.

 

Jajmen kredita i gat raet blong mekem wan aplikesen long Kot mo askem blong reniuwim wan Infosmen Waren we i expae.

 

Fi blong faelem wan Aplikesen mo fi blong Sherrif

 

Bae hemi kostem yu araon VT 3,000 blong faelem wan Aplikesen blong wan Infosmen Oda o Waren. Fi ia hemi difren long ol ligel fi we yu stap pem long loia blong yu.

 

Taem we Sheriff i risponsibol blong salem wan propeti, 10% blong amaont we hemi risivim  ia bae i go long Kot olsem administresen fi. Yu pem Administresen fi ia i go long Kot be i no long sheriff.

 

Bae yumi jes luk long wan narafala artikel olsem wanem nao Sheriff i stap executim ol Infosmen Waren ia mo wanem opsen yu olsem wan jajmen debta yu gat.

 

DISCLEMA: Hemia wan ligel spes wea yu save faenem ol besic infomesen abaot loa mo olsem

wanem Kot i wok. ol infomesen ia oli no ligel advaes be oli stap blong helpem eniwan i

andestanem wanem blo mekem.

sapos yu kat eni kwestin o nidim eni clarifikesen abaot ol infomesen ia yu save raet i kam long

(vanuatulaw@gmail.com) o visitim websaet blong mifala long (www.pawthelaw.info)

 

 

 

 

Leave a Reply

Your email address will not be published. Required fields are marked *