0

CIVIL ADOPSEN LONG VANUATU

Atikel ia bae hemi tokbaot prosess blong ligel adopsen, olsem wanem blong adoptem wan pikinini, wanem ifect blong wan ligel adopsen mo olsem wanem blong aplae from wan ligel adoptsen. Ligel adopsen mo kastom adopsen hemi tu difren samting.

Atikel ia hemi no tokbaot Kastom adopsen  we hemi stap hapen folem fasin blong yumi long Vanuatu. Loa blong yumi hemi luksaeve kastom be Kot hemi no dil wetem Kastom adopsen.

WANEM IA CIVIL ADOPSEN?

Civil adopsen hemi fasin we ol parens blong wan pikinini oli agri blong givimaot pikinini blong olgeta long wan narafala man. Afta we adopsen i tekem ples,  papa mo mama  oli nomo gat raet long pikinini we tufala i givimaot long adopsen. Pikinini ia hemi kam pikinini blong olgeta we oli adoptem hem. Bae pikinini ia i jenisim nem blong hem mo bae hemi kat semak raet olsem ol narafala pikinini blong man we i adoptem hem. Afta we adopsen i tekem ples i nogat man i save jenisim .

FROM WANEM NAO ADOPSEN?

Long Vanuatu fulap pikinini oli adopted nomo from se mama blong pikinini ia hemi yangfala tumas blong lukaotem pikinini, hemi no skul gud  o hemi nokat mani mo papa blong pikinini i no wantem hem wetem pikinini  mo mama ia hemi disaet se i moa gud hemi givimaot pikinini ia oli adoptem hem olsem pikinini  i save gat wan gufala laef.  Be samtaem ol parens no olgeta we oli stap lukaotem pikinini oli no wantem pikinini ia so oli disaet blong givimaot hem.

YU SAVE ADOPTEM WAN MAN WE HEMI 18 YIA OVA?

Loa hemi no alawem adopsen blong wan man we hemi 18 yia over. Nao sapos yu stap tingting blong adoptem wan pikinini, yu no mas wet se taem pikinini i stap closap long 18 yia nao bae yu statem blong priparem ol pepa blong adopsen,yu mas aplae bifo pikinini ia i kasem 18 yia.

WHO I SAVE ADOPTEM WAN PIKININI?

wan singel i save askem adopsen o ol maret kapol. Maret Kapol long ples ia i minim wan man mo wan woman we tufala i maret blong 5 yia o moa. Wan singel man i no save adoptem wan pikinini gel. Be Kot i save alawem nomo sapos hemi luk se i gat ol strong risen we oli sapotem  adopsen ia. Eniman we i no wan memba blong family be hemi wantem adoptem wan pikinini bae hemi mas kat 25 yia o moa.

OLSEM WANEM BLONG APLAE FROM WAN ADOPSEN?

Eniman we i wantem aplae from adopsen hemi save pass long Suprim Kot blong tekem wan copy blong aplikesen fom blong adopsen.  Fom ia hemi askem ol besic infomesen  olsem nem, adress mo wok blong apliken mo tu ol ditel blong pikinini.

 

Afta we yu fulumap fom ia yu mas priparem ol pepa ia blong go wetem:

  • Wan agrimen we ol parens blong pikinini oli saenem blong givimaot pikininia ia long adopsen. Be sapos wan long ol parens blong pikinini i no wantem saenem agrimen ia o hemi ronwe long pikinini ia, apliken i mas putum daon ol risen ia long wan diferen swon statemen  mo  i mas explenem from wanem  Kot  i save ignorem agrimen blong hem
  • Birth certificate blong pikinini
  • Medical jekap blong ol apliken
  • Copi blong paspot blong ol apliken

Kot i askem mao pepa blong apliken i mas putum wetem olgeta anta pia, olsem:

  • Birth certificate blong ol apliken
  • Certificat blong maret blong ol apliken
  • Eni man we i no blong Vanuatu be i kam stap long ples ia i no bitim 12 manis be i wantem adoptem wan pikinini bae hemi mas tekem medical ripot blong hem long kantri blong hem
  • Eni man we i no blong Vanuatu be i kam stap long ples ia i no bitim 12 manis be i wantem adoptem wan pikinini bae hemi mas tekem spicolojist ripot blong hem long kantri blong hem
  • Sapos apliken i no blong Vanuatu hemi mas submitim wan independen asesmen ripot we adopsen otoriti blong kantri blong hem i preparem we i shoem se hemi save adoptem wan pikinini aotsaet long kantri blong hem
  • Faenansel ripot blong apliken
  • 3 leta from ol fren we oli save long apliken o ol man we apliken i wok wetem olgeta ova long 5 yia

Kot i save askem moa infomesen sapos hemi ting se hemia i blong gud blong pikinini.

Afta we apliken i faelem ol pepa ia bae Kot i givim wan deit blong harem aplikasen ia mo bae apliken i mas kam long Kot wetem papa mo mama blong pikinini. Masta blong Suprim Kot nao bae i harem aplikesen ia.

NOTE:Kot i no letem apliken blong i tekemaot wan pikinini sapos hemi no submitim evri pepa ia mo Kot i no harem aplikesen ia fastaem.

WANEM I HAPEN LONG FAS HEARING BLONG KOT?

Masta blong Suprim Kot i go tru long ol pepa we apliken i submitim, spos i nidim blong providem moa infomesen bae hemi askem. Long taem ia bae Kot i askem long ol apliken oli kamaot mo hemi toktok wetem papa mo mama blong pikinini nomo  blong mekem sua se apliken i no givim eni mani no mekem promes blong givim ol samting long papa mo mama blong pikinini.

Taem we Kot i luk se ol apliken oli givim evri infomesen mo oli stret blong adoptem pikinini nao bae Kot i mekem wan interim oda we i givim raet long apliken blong tekem pikinini blong 3 manis fastaem. Sapos apliken i liv aotsaet long Vanuatu bae Kot i mekem wan oda blong pikinini i save aot long Vanuatu long 3 manis ia.

Long taem ia tu bae Kot i talem long apliken wetaem bae oli mas kambak long Kot mo givim wan det long aplikem blong i submitim eni mao infomesen we Kot i askem.

Sapos ol apliken oli liv nomo long Vanuatu bae Kot i sendem wan spicolojist I go long haos blong ol apliken bifo en blong 3 manis ia blong spicolojist i save preparem wan ripot blong hom blong ol apliken mo submitim long Kot.

Taem we Masta i ricivim evri pepa mo ripot bae hemi mekem wan faenal recomendesen i go long wan sinia Jaj blong Suprim Kot blong i harem faenol aplikesen mo disaet sapos bae hemi givim o no givim pikinini ia long al apliken.

WANEM BLONG MEKEM AFTA YU RISIVIM ODA BLONG YU?

Afta we yu ricivim oda ia yu save tekem i go long civil status blong oli jenisim nem blong pikinini mo yusum blong aplae from wan paspot blong pikinini.

WANEM FI BLONG ADOPSEN?

Taem apliken i kam blong faelem ol pepa bae hemi pem wan fi blong VT 20,000. Apliken bae I pem wan moa fi blong VT 25,000 taem Kot i sendem spicolojist i go blong mekem wan asesmen long haos blong apliken. I gat ol ligel fi tu we I dipen long loia we apliken i tekem mo hemia hemi araon VT 100,000 o moa.

NOTE:Fulap apliken oli tekem kes olgeta nomo sapos oli no wantem pem ligel fi mo Kot I helpem olgeta blong explenem wanem blong mekem. Be ol apliken we oli no liv long Vanuatu oli faenem i moa isi blong pem wan loia blong i mekem wok long bihaf blong olgeta.

OL PIKININI WE OLI ADOPTEM OL OLI STIL KIPIM KONTAC WETEM PAPA MO MAMA BLONG OLGETA?

Taem we papa mo mama blong pikinini tufla kam long kot long fes ples, Kot i explenem long tufala se afta we oli agri blong kivimaot pikinini , oli nomo gat raet long hem. Be fulap taem ol apliken oli talem se oli wantem pikinini ia blong i save ol famili blong hem long ples ia mo sam oli mekem sua se oli sendem pija blong pikinini ia i kam long papa mo papa blong hem o oli tekem pikinini i kambak wantaem long wan yia blong i visitim ol famili.

Hemi impoten blong andestanem se desisen blong kipim kontac hemi stap nao long ol adoptif parens blong pikinini.

MOA INFOMESEN

Raeta blong atikel ia hemi harem se ol loa meka blong yumi oli stap raetem wan adopsen bil naya we sapos palemen i pasem i kam loa bae i maet jenisim ol prosess we yumi tokbaot long ples ia. Bae mifala i updatem ufla long ol samting we bae oli jenis taem adopsen bill ia oli pasem i kam loa.

DISCLEMA: Hemia wan ligel spes wea yu save faenem ol besic infomesen abaot loa mo olsem

wanem Kot i wok. ol infomesen ia oli no ligel advaes be oli stap blong helpem eniwan i

andestanem wanem blo mekem.

sapos yu kat eni kwestin o nidim eni clarifikesen abaot ol infomesen ia yu save raet i kam long

(vanuatulaw@gmail.com) o visitim websaet blong mifala long (www.pawthelaw.info)

Leave a Reply

Your email address will not be published. Required fields are marked *