ANDESTANEM KOST LONG WAN CIVIL KES
Long taem we Kot i stat blong harem kes blong yu bae yu faenemaot se i kat sam kost blong pem. Nao kost ia samtaem bae yu pem o man long narasaet bae i pem.
Ol kost ia oli ol ligel kost we Kot i odarem agensem man we i lusum kes blong hem i pem i go long man we i winim kes.
Taem wan man i lusum wan kes bae Kot i odarem hem blong pembak mane we man we i win i spendem blong tekem kes ia i go long Kot. Nao kost we Kot i stap odarem hemi wan standet kost nomo mo samtaem bae hemi no kavremap evri expensis blong yu long kes be i sam nomo. Nae bae yu faenemaot se Kot i no yusum tumas indemniti kost we i stap blong mekem sua se man we i lusum kes I pembak evri expensis blong yu. Bifo Kot I odarem wan indemniti kost bae loia blong yu i mas kat pruf se man we i lusum kes ia hemi kiaman mo i tekem kes ia i go long Kot blong mekem yu harem nogud nomo mo hemi wastem time blong Kot. Sapos Kot i faenem se ol samting ia i true nao bae hemi mekem wan oda blong indemniti kost.
Long stret fasin blong wok, taem yu tekem wan loia oltaem hemi mas givim list blong wok we yu askem hem blong mekem mo fi blong ol wok ia. Yu mas pem loia blong yu bifo hem tekem kes blong yu i go long Kot. Taem we Kot i awodem kost mo man we i lusum kes i pem ol kost ia i go long loia blong yu, bae loia blong yu i mas kimbak mani ia long yu. Be sapos we loia blong yu i givim wan invoes long yu be yu no pem hem yet nao bae hemi save holemtaet kost ia blong pem ol wok we hemi mekem. Sapos ol mane ia oli no naf blong pem ol fi blong ol evri wok we loia blong yu i mekem bae yu mas pem haf we i stap.
Afta we Kot i harem wan kes hemi folem ol step ia blong mekem wan oda blong kost:
- Kot bae i askem loia blong man we i winim kes se hamas kost nao hemi stap askem. Kot bae i givim sam taem long loia blong man we i luss blong givim tingting blong hem long amaont ia. Afta bae Kot i mekem wan oda blong talem hamas mane nao hemi stap givim long man we i win mo wetaem bae man we i lusum kes blong hem i mas pem ol kost ia; o
- Kot i save mekem wan oda se bae oli jes dil wetem evri kost wantaem taem Kot i givim last desisen blong hem long kes ia.
Sapos we Kot i disaet se bae i dil wetem kost long end blong kes wantaem, man we i winim kes bae i mas preparem wan bil blong ol kost we oli kolem “ Bill of Costs” mo askem Kot blong i go tru long bil ia mo desaet wanem nao hemi stret blong givim long man we i winim kes blong hem. List ia bae i showem evri wok we loia i mekem long stat blong kes kasem end blong kes. List i includum evri expensis mo ol haoa we loia i spendem blong complitim ol wok ia. Afta bae Kot i askem long tufala loia blong oli go tru long list ia. Loia we i preparem bil ia i mas rere blong shoem wok we hemi mekem wetem haoa we hemi spendem blong mekem ol wok ia. Sapos narafala loia i no agri long wan samting long list ia, hemi mas givim risen blong hem mo bae Kot jes disaet se bae i givim kost ia o nogat . Afta long hemia, bae Kot i mekem wan oda long ful amaont blong kost mo expensis mo i givim wan taem we bae man we i lusum kes bae i mas pem kost ia long hem.
Yusave agri wetem loia blong yu long wan fi blong VT 10,000 o moa blong yu pem hem folem haoa we hemi mekem ol wok blong yu be taem Kot taem hemi kalkuletem kost long wan kes, oltaem hemi yusum standet ret we hemi VT 10,000 long wan haoa.
Nao sapos we man we i lusum kes i no pem kost long taem olsem we Kot i odarem, man we i win i save askem long loia blong hem blong i askem blong Kot blong i enfosem ol kost ia agens long man we i lusum kes. Bae yumi lukluk moa long ol enfosmen ia long wan narafala atikel.
Nao sapos we yu lusum kes blong yu, bae Kot i save odarem kost agensem yu tu. I minim se yu nao bae yu mas pem kost i go long narafala man we i winim kes. Sapos we yu no pem kost ia long taem we Kot i putum bae man we i win bae i save passem yu long Kot blo mekem sua se yu pem ol kost ia.
I kat sam taem we Kot bae i save odarem wan pesonel kost agensem loia blong yu o narafala loia. Kot hemi mekem ol oda olsem taem i luk se wan loia i no mekem gud wok blong hem o i mekem wan samting we i mekem se Kes ia oli no save wok long hem hariap. Samtaem from loia i faelem sam aplikesen o klem we i no nesesari blong faelem. Long taem olsem bae Kot i odarem loia blong pem kost. Nao long situesen olsem bae loia blong yu bae i no save askem yu blong pem ol pesonel kost ia. From ol kost ia oli agensem hem nomo mo hem nao bae i pem.
Sapos we yu nokat loia be yu wan nomo yu tekem kes blong yu i go long Kot, bae yu no save askem ligel fi. Bae yu save askem Kot blong hemi mekem wan oda blong kost blong expensis blong yu nomo mo yu mas kat pruf blong ol expensis ia blong shoem long Kot.
DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan i andestanem wanem blo mekem.
sapos yu kat eni kwestin o nidim eni clarifikesen abaot ol infomesen ia yu save raet i kam long (vanuatulaw@gmail.com) o visitim websaet blong mifala long (www.pawthelaw.info)