Articles

Evri wok we wan loia i mekem i kat fi blong hem. Be taem wan loia i sendem wan invoes i go long wan klaen, maet fulap oli no save olsem wanem nao loia i stap preparem ol invoes ia.

Wan loia hemi semak nomo long wan dokta, wan capenta o wan elektrisen. Taem yu go luk olgeta blong mekem wan wok blong yu, oli save givim wan invoes long yu bifo o afta we oli mekem wok ia.  Maet yu bin harem ol toktok olsem “ haoali fi”, “ continjensi fi”,  “ritena fi” o “flat fi” be yu no save mining blong olgeta.

Wan “haoali fi”hemi wan fi we loia i putum folem haoa we hemi spendem blong wok long kes blong yu.  Fulap loia long Vanuatu oli stap usum fi ia nao. Eni loia we i usum kaen fi ia bae oltaem hemi raetem daon ol haoa ia long wan buk o long computa mo afta bae i givim wan invoes long yu. Sapos fi blong loia ia hemi VT15,000 long wan haoa mo hemi spendem 3 haoa blong raetem klem blong yu, bae yu pem hem VT 45,000.  Yu kat raet blong askem long loia blong hemi givim wan list blong ol wok we hemi mekem long kes blong yu.

Wan “ritena fi”hemi wan amaont we yu pem i go long loia olsem ligel fi afta long fas miting blong yutufala. Eni wok we loia i mekem long kes blong yu bae hemi karemaot mani long amaont ia nomo. Hemi gud blong yusum wan ritena fi taem we loia i jajem yu folem haoa. Hemi gud tu from loia bae i wokemaot hamas haoa nao bae hemi spendem long kes blong yu mo bae hemi tekemaot fi blong hem long amaont ia nomo. Yu save toktok wetem loia blong yu abaot ol taem we yu wantem topemap amaont ia. Sapos we amaont ia i finis, yu save stap continu blong pem loia folem ol wok we hemi mekem nomo.  Olsem yu save folem wok bong loia tu mo save wea nao kes blong yu i stap long hem mo save stret hamas mani bae yu spendem.

Wan “continjensi fi”arenjmen hemi taem we loia I agri blong yu no mekem eni payment naya be bae hemi jes tekemaot wan pecent long amaont blong mani we bae yu ricivim taem yu winim kes blong yu. Wetem wan “continjensi fi”, yu no nid blong pem eni fi long stat from taem we yu winim kes blong yu bambae loia i jes tekemaot fi blong hem. Bae yu fanem se oli yusum moa “continjensi fi” long ol aksiden kes. NAO SAPOS YU LUSUM KES BLONG YU MO LOIA I GIVIM WAN INVOES BLONG YU PEM, HEMIA I NO WAN CONTIJENSI FI.

Yu mas lukaot taem yu stap agri long wan “continjensi fi” from loia blong yu bae i kat wan intres tu long kes blong yu nao. Samtaem bae hemi no mekem wok olsem we yu yu wantem. Samtaem kes blong yu i simpol be bae loia i save pulum kes ia i go longtaem moa from hemi save se mani we bae hemi ricivim afta bae i bigwan.

Wan “flat fi” hemi wan fi we yu pem wan taem nomo. Ol fi olsem yu save faenem taem yu askem wan loia blong i priparem wan Will, wan Agriment o i representem yu wantaem nomo long Kot. Nao yu mekem sua se evri agrimen we yu mekem wetem loia blong yu, hemi mas raetem daon mo yutufala I saenem oltaem. Agrimen ia bae i mas givim stret infomesen long yu olsem wanem wok bae loia I mekem, bae hemi tekem hamas taem mo wetaem bae hemi givim invoes long yu.

Evri invoes we loia blong yu i givim long yu i mas soem list blong ol wok we hemi mekem, ol fi blong ol wok ia mo sapos fi ia hemi stret wetem fi we yu agri wetem long stat. Sapos yu luk se wan samting i no stret long invoes ia, yu no mas fraet blong askem long loia blong i explenem. Yu mekem sua se oltaem loia blong yu i mas givim wan invoes blong ol wok blong hem long yu. Taem yu ricivim invoes mo bifo yu pem loia, yu lukluk gud se wanem we bae yu pem hemi stret wok we loia i mekem.  Be sapos we loia i askem blong yu pem hem bifo taem we yutufla i agri long hem, yu mekem sua se hemi complitim ol wok we yutufala i tokbaot afta yu jes pem hem. Nao sapos yu pem wan loia afta yu faenemaot se hemi no mekem wok blong hem, yu kat raet blong askem long hem i givim bak mani blong yu.

Yu mas wajaot long ol loia we oli stap askem blong yu pem olgeta bifo yufala i saenem wan agrimen. I gat olgeta tu we oli stap askem blong yu pem olgeta be oli no givim wan invoes long yu o explenem wanem wok nao yu stap pem olgeta from. Ol loia olsem oli save mekem yu pem olgeta ova long nomal fi o oli mekem yu pem olgeta be oli no mekem eni wok.

DISCLEMA: Hemia wan ligel spes wea yu save faenem ol besic infomesen abaot loa mo olsem wanem Kot i wok. ol infomesen ia oli no ligel advaes be oli stap blong helpem eniwan i andestanem wanem blo mekem.